مزاحیہ اداکار جمشید انصاری کی 12ویں برسی (آج )منائی جائے گی

لاہور (اُردو پوائنٹ اخبارتازہ ترین - این این آئی۔ 23 اگست2017ء) ٹی وی کے معروف مزاحیہ اداکار جمشید انصاری کی 12ویں برسی آج( جمعرات ) 24اگست کو منائی جائے گی۔ جمشید انصاری 31 دسمبر 1942ء کو بھارت کے شہر سہارن پور میں پیداہوئے ، وہ چھ برس کے تھے کہ انکاخاندان بھارت سے ہجرت کرکے کراچی منتقل ہوگیا۔وہ گریجوایشن کرنے کے بعد برطانیہ چلے گئے جہاں انہوں نے کچھ عرصہ برطانوی نشریاتی ادارے میں کام کیااورٹی وی پروڈکشن کے کورسزبھی کیے ۔

1968ء میں وطن واپس آکرانہوں نے ٹی وی ڈراموں میں کام شروع کردیااور اپنے کیریئر کاآغازڈرامہ جھروکے سے کیا۔انہوں نے کیریئرمیں دوسوکے قریب ٹی وی ڈراموں اورفلموں میں اداکاری کے جوہردکھائے ۔جمشید انصاری نے ٹیلی ویژن کے ڈراموں، انکل عرفی،تنہائیاں، زیر زبر پیش، منزلیں، افشاں، ہمارے گھر میںاور دیگر میںبہترین اداکاری سے لوگوں کے دل جیت لیے۔

(جاری ہے)

200 سے زائد ڈراموں میں کام کرنے والے اس نامور اداکار نے 40سال کا عرصہ اسٹیج، ریڈیو اور ٹیلی ویژن کے پروگراموں میں گزارا، انہوں نے ریڈیو کے مشہور پروگرام حامد میاں کے ہاں میں صفدر کا یاد گار کردار ادا کرکے زبردست شہرت حاصل کی جبکہ اسٹیج ڈرامے بکرا قسطوں میں بھی بہترین اداکاری کا مظاہرہ کیا۔ ان کے مشہورڈراموں میں گھوڑاگھاس کھاتاہے ’’انکل عرفی،ان کہی ، تنہائیاں ، زیر زبر پیش ، شوشہ ،ہاف پلیٹ جبکہ فلموں میں سوغات ،پاکیزہ اوراج دیاں کڑیاں ‘‘شامل ہیں۔ پاکستان ٹیلی ویژن کے بے شمار ڈراموں سے شہرت حاصل کرنے والے نامور مزاحیہ اداکار جمشید انصاری کو اس دنیا سے رخصت ہوئی12برس بیت چکے ہیںوہ 24اگست 2005کو 63برس کی عمر میں طویل علالت کے بعد جہان فانی سے کوچ کر گئے۔