ماضی کی نامور اداکارہ و گلوکارہ نگینہ خانم کی 14ویں برسی (آج )منائی جائے گی

لاہور (اُردو پوائنٹ اخبارتازہ ترین - این این آئی۔ 23 اگست2017ء) ماضی کی نامور اداکارہ و گلوکارہ نگینہ خانم کی 14ویں برسی آج( جمعرات ) 24اگست کو منائی جائے گی۔ نگینہ خانم کا تعلق پشاور سے تھا۔ انہوں نے اپنے فلمی کیریئر کا آغاز بطور گلوکارہ کیا اور مختلف پشتو فلموں کے لیے ایک سو تیس گانے گانے کے علاوہ ایک سو سے زائد فلموں میں بھی کام کیا۔انہیں بطور اداکارہ ایس ایم یوسف نے اپنی فلم ’’اولاد ‘‘میں متعارف کرایا ان کے مدمقابل اداکار لہری تھے۔

نگینہ خانم نے کئی پشتو فلموں میں بدرمنیر کی والدہ کا کردار ادا کیا اور اس کردار کے لیے وہ پشتو فلموں کا اسی طرح ایک لازمی حصہ سمجھی جاتی تھیں جس طرح پنجابی فلموں میں اداکارہ بہار بیگم سمجھی جاتی ہیں۔بطور اداکارہ نگینہ خانم کی آخری فلم ’’مہندی والے ہتھ‘‘ تھی۔

(جاری ہے)

نگینہ خانم نے گلوکاری اور اداکاری کے علاوہ خود بھی پانچ فلمیں بنائیں۔

ان میں سے ایک فلم جینے دو اردو زبان جبکہ باقی پشتو میں تھیں۔ نگینہ خانم نے فلم انڈسٹری میں متعدد فلموں میں کردار نبھائے اور انہوں نے کئی اداکاروں کو بھی متعارف کرایا۔ نگینہ خانم کو 24 ستمبر 2003ء میں ان کی رہائشگاہ پر قتل کردیا گیا تھا۔ نگینہ خانم کے صاحبزادے نواز خان آج بھی فلم انڈسٹری اور ٹی وی کے جانے پہچانے اداکار ہیں اور متعدد فلموں، ڈراموں اور ویڈیوز میں کام کر چکے ہیں۔