وزیر مملکت و چیئرپرسن بی آئی ایس پی ماروی میمن کا دورہ سکھر ،NSERاپڈیٹ کیلئے ہونے والے نئے سروے کا جائزہ لیا

اسلام آباد (اُردو پوائنٹ اخبارتازہ ترین - آن لائن۔ 21 اگست2017ء) وزیر مملکت و چیئرپرسن بی آئی ایس پی ، ایم این اے ماروی میمن نے آج سکھر کا دورہ کیا جہاں انہوں نے NSERاپڈیٹ کیلئے ہونے والے نئے سروے کا جائزہ لیا۔ انہوں نے نصرت کالونی، تماچی گائوں اور بگارجی میں گھروں کا دورہ کیا اور NSERسروے کے حوالے سے رائے جانے کیلئے مختلف گھرانوں سے ملاقات کی۔

سکھر میں اکتوبر 2016سے فروری 2017تک113کائونٹرز کے ذریعے ڈیسک رجسٹریشن کے تحت گھرانوں کا اندراج کیا گیا۔ 174,851متوقع کیسزز پر 178,531گھرانوں کا اندراج کیا گیا۔جولائی 2017میں گھر گھر سروے کا آغاز کیا جاچکا ہے جو اس بات کو یقینی بنائے گیا کہ کوئی گھر رجسٹرہونے سے نہ رہ جائے، جس میں اب تک 20,025گھرانوں کا سروے کیا گیا ہے۔ ڈیسک رجسٹریشن اور گھر گھر سروے کے درمیان اعدادوشمار کا موازنہ، بی آئی ایس پی کیلئے ایک ڈائنامک رجسٹری کی تشکیل کیلئے ماڈل ڈیزائن کرنے میں مدد دے گا۔

(جاری ہے)

اس موقع پر گفتگو کرتے ہوئے ، چیئرپرسن بی آئی ایس پی نے کہا کہ NSERآبادی کی معلومات کے حوالے سے پاکستان کی سب سے پہلی ڈائریکڑی ہے جو ترقیاتی منصوبہ بندی کیلئے ایک اہم اثاثہ ہے۔ انہوں نے مزید کہا کہ گزشتہ چار سالوں میں بی آئی ایس پی نے اپنا دائرہ کار بڑھاتے اور سروس ڈیلوری کو بہتر بناتے ہوئے قابل تعریف ترقی کی ہے۔ NSERاپڈیٹ کیلئے کیا جانے والا نیا سروے مکمل طور پر آٹومیٹڈ اور ٹیکنالوجی پر مبنی ہے جو غلطی سے پاک اندراج کو یقینی بنانے کیلئے ٹیبلٹس کے ذریعے کیا جارہا ہے۔

شمارکنندگان سے بات چیت کرتے ہوئے ، انہوں نے کہا کہ ڈیٹا اکھٹا کرنا ایک مقدس فریضہ ہے کیونکہ جو ڈیٹا وہ آج اکھٹا کیا جاتا ہے وہ مستقبل میں منصوبہ بندی کی بنیاد ہوگا۔چیئرپرسن بی آئی ایس پی نے ذمہ دارانہ طریقے سے سخت گرمی میں گھر گھر دورہ کر کے مشقت طلب نوکری کو نبھانے پر شمارکنندگان کی تعریف کی۔ انہوں نے گائوں یار محمد گھمرو یو سی بھگرگی کا دورہ بھی کیا جہاں انہوں نے بی آئی ایس پی بینیفشری کمیٹی (BBCs) کی چالیس خواتین رہنمائوں کی ٹریننگ میں شرکت کی۔

انہوں نے کہا کہ خاموش انقلاب کی صلاحیت ایسی خواتین کے ہاتھوں میں ہے جو آگے بڑھتے ہوئے اپنی قیادت کے اندردیگر سینکڑوںبی آئی ایس پی مستحقین کی زندگیوں میں تبدیلی لائیں گی۔ چیئرپرسن بی آئی ایس پی نے IBAسکھر کا دورہ کیا جہاں انہوں نے طالب علموں سے ملاقات کی۔ ان سے گفتگو کرتے ہوئے ، انہوں نے کہا کہ نوجوان تبدیلی اور اصلاح کا پیش خیمہ ہیں۔

یہ اپنے تعاون اور مدد سے معاشرے کو بااختیار بناسکتے ہیں تاکہ ان کی زندگی کی مشکلات پر قابو پایا جاسکے۔ بی آئی ایس پی ایک ایسا پلیٹ فارم ہے جو پسماندہ خواتین کوبراہ راست رسائی فراہم کرتا ہے۔ یہ لاچار افراد کو معاشرے کا کارآمد رکن بنانے میں انکی مدد کا قومی فریضہ ہے۔ چیئرپرسن بی آئی ایس پی نے طالب علموں کوبی آئی ایس پی کے "یونیورسٹی پاورٹی گریجویشن بڈی پروگرام-"میں شرکت کی دعوت دی جو غریب خواتین کو غربت سے باہر نکالنے کیلئے نوجوانوں اور غریب خواتین کو منسلک کرتا ہے۔

انہوں نے مزید کہا کہ اس شراکت داری کے تحت، یونیورسٹی کے طالب علم بی آئی ایس پی مستحقین کو ان کی صلاحیتوں کی شناخت، قابلیت کو نکھارنے اور ان کو درپیش مسائل کے پائیدار حل کیلئے ان کی رہنمائی کرنے میں مددکریں گے۔ میڈیا سے گفتگو کرتے ہوئے، انہوں نے کہا کہ GTرو ڈ ریلی عوام کی اپنی قائد سے محبت اور احترام کو ظاہر کرتی ہے۔ NA 120میں پاکستان مسلم لیگ (ن) کی جیت اس بات کا ثبوت ہوگی کہ عوام پاکستان مسلم لیگ اور نواز شریف کیساتھ ہے۔