میری اطلاع کے مطابق ابھی کوئی ریفرنس دائر نہیں ہوا ،ْ وزیرمملکت طلال چوہدری

پارلیمنٹ کی عزت کی حفاظت کرنا اسپیکر کا فرض ہے ،ْ انٹرویو

ہفتہ 19 اگست 2017 14:39

میری اطلاع کے مطابق ابھی کوئی ریفرنس دائر نہیں ہوا ،ْ وزیرمملکت طلال ..

اسلام آباد (اُردو پوائنٹ اخبارتازہ ترین - این این آئی۔ 19 اگست2017ء) وزیر مملکت طلال چوہدری نے کہا ہے کہ پارلیمنٹ سب سے سپریم ہے اس کی عزت کی حفاظت کرنا اسپیکر کا فرض ہے۔نجی ٹی وی سے گفتگو کرتے ہوئے مسلم لیگ (ن) کے رہنما اور وزیر مملکت طلال چوہدری نے کہا کہ ان کی اطلاع کے مطابق ابھی ریفرنس دائر نہیں ہوا۔ انہوں نے کہا کہ اسپیکر پارلیمنٹ کے کسٹوڈین ہیں اس لیے پارلیمنٹ کی عزت اور تحریم کی حفاظت کرنا ان کا فرض ہے۔

طلال چوہدری نے کہا کہ دنیا میں اصول ہے کہ پارلیمنٹ سب سے سپریم ہوتی ہے ،ْ پارلیمنٹ کی توہین کا ایک اصول ہے ،ْ دنیا میں بہت ملک ایسے ہیں جہاں بہت افسران اور ججوں کے خلاف پارلیمنٹ کی توہین پر کارروائی ہوئی۔وزیر مملکت نے کہاکہ ریاست عوام اور پارلیمنٹ کی توہین سب سے سپریم ہے اور اسپیکر کا فرض بنتا ہے کہ وہ اس ذمہ داری کو نبھائے کیونکہ اگر کوئی ادارہ اپنی عزت نہیں کرائے گا تو کوئی اس کی عزت نہیں کرے گا۔

(جاری ہے)

انہوں نے کہا کہ پارلیمنٹ دوسرے اداروں کو حق دیتی ہے کہ ان کی توہین پر کیا سزا ہوگی تو پھر ایسے ادارے کی توہین کیوں کی جائے۔طلال چوہدری نے کہا کہ اتنا بڑا فیصلہ آیا جو متنازعہ ہے ،ْایک وزیراعظم آرام سے گھر چلا گیا اس نے انگلی تک نہیں اٹھائی۔ انہوں نے کہا کہ پاکستان کے لوگ دیکھ رہے ہیں کہ کون مقدس گائے ہیں، اگر کسی سے غلطی ہوئی ہے تو اسے گھر جانا چاہیے۔