تحریک انصاف اسلام آباد کی یونین کونسل آئی ایٹ میںیوسی چیرمین علی اعوان اور ان کی ٹیم کی بھرپور کاوشوں کی بدولت نئے ٹیوب ویل کا افتتاح کر دیا گیا

جمعرات 17 اگست 2017 21:13

اسلام آباد(اُردو پوائنٹ اخبارتازہ ترین - این این آئی۔ 17 اگست2017ء) تحریک انصاف اسلام آباد کی یونین کونسل آئی ایٹ میںیوسی چیرمین علی اعوان اور ان کی ٹیم کی بھرپور کاوشوں کی بدولت نئے ٹیوب ویل کا افتتاح کر دیا گیا۔اس سلسلے میں گزشتہ روز میٹروپولیٹین کارپوریشن اسلام آباد کے قائد حزب اختلاف علی اعوان کے زیر اہتمام ایک تقریب کا انعقاد کیاگیا جس کے مہمان خصوصی پی ٹی آئی کے مرکزی و سینئر رہنما و ایم این اے اسد عمر تھے۔

تقریب سے خطاب کرتے ہوئے اسد عمر کا کہنا تھا کہ بلدیاتی ایلیکشن میں کیا گیا ایک اور وعدہ آج پورا ہو گیا۔ اسلام آباد میں پانی کی شدید قلت پائی جاتی ہے اور اس کو پورا کرنے کے لیے ایک اور ٹیوب ویل کا اضافہ تحریک انصاف کی پانی کی کمی کو پورا کرنے کی انتھک کوششوں کی ایک کڑی ہے جو آج پایہ تکمیل کو پہنچی ہے۔

(جاری ہے)

اسد عمر کا مزید کہنا تھا کہ بلدیاتی ایلیکشن کے نتیجے میں اختیارات کی نچلی سطح تک منتقلی تاحال تاخیر کا شکار ہے جس کی بڑی وجہ حکومت کا اسلام آباد کی عوام کو ان کے حقوق سے محروم رکھنا ہے۔

تحریک انصاف عوام کی فلاح و ترقی پر یقین رکھتی ہے اور ان کے حقوق کے لیے قومی اسمبلی سمیت ہر فورم پر آواز بلند کرتی رہے گی۔اس موقع پر آئی ایٹ کی عوام نے پی ٹی آئی کی قیادت پر بھرپور اعتماد کا اظہار کیا۔