بری فوج کے سربراہ جنرل قمر جاوید باجوہ کا کنٹرول لائن پر اگلے مورچوں کا دورہ

آرمی چیف کو بھارتی فوج کی جانب سے کنٹرول لائن پر جنگ بندی کی غیر معمولی خلاف ورزیوں میں اضافہ اور پاکستانی فوج کے مؤثر جواب کے بارے میں آگاہ کیا گیا

پیر 14 اگست 2017 18:01

بری فوج کے سربراہ جنرل قمر جاوید باجوہ کا کنٹرول لائن پر اگلے مورچوں ..

راولپنڈی ۔ (اُردو پوائنٹ اخبارتازہ ترین - اے پی پی۔ 14 اگست2017ء) بری فوج کے سربراہ جنرل قمر جاوید باجوہ نے پیر کو کنٹرول لائن پر اگلے مورچوں کا دورہ کیا۔ پاک فوج کے شعبہ تعلقات عامہ (آئی ایس پی آر) کی طرف سے یہاں جاری بیان کے مطابق اس موقع پر آرمی چیف کو بھارتی فوج کی جانب سے کنٹرول لائن پر جنگ بندی کی غیر معمولی خلاف ورزیوں میں اضافہ اور پاکستانی فوج کے مؤثر جواب کے بارے میں آگاہ کیا گیا۔

(جاری ہے)

آرمی چیف کو بتایا گیا کہ پاک فوج کی پیشہ وارانہ اقدار اسے کنٹرول لائن کے قریب سویلین آبادی کو نشانہ بنانے کے بھارتی فوج کی طرح کے اقدام کا جواب دینے سے روکتی ہے۔ آرمی چیف نے فوجیوں کے جذبے کو سراہا اور کہا کہ جشن آزادی کو وطن کے دفاع سے بہتر طریقہ سے نہیں منایا جا سکتا۔ آرمی چیف نے کہا کہ بھارتی فوج کا ظلم و ستم مقبوضہ کشمیر کے بہادر کشمیریوں کی قربانیوں اور جذبے کو ختم نہیں کر سکتا۔ انہوں نے کہا کہ جبرو استبداد کے خلاف کشمیریوں کی جدوجہد میں ہم ہمیشہ ان کے ساتھ رہیں گے۔ قبل ازیں اگلے مورچوں پر پہنچنے پر کور کمانڈر راولپنڈی لیفٹیننٹ جنرل ندیم رضا نے آرمی چیف کا استقبال کیا۔