سعودی عرب میں 90 لاکھ ایمفیٹامائن گولیاں اسمگل کرنے کی کوشش ناکام

سعودی عرب اورامارات میں اسمگلنگ کی اس کارروائی کے الزام میں ایک سعودی شہری اور دس شامیوں کو گرفتار کرلیا گیا

پیر 14 اگست 2017 13:16

جدہ/ابوظہبی(اُردو پوائنٹ اخبارتازہ ترین - این این آئی۔ 14 اگست2017ء) سعودی سکیورٹی فورسز اور متحدہ عرب امارات کے حکام نے مشترکہ کارروائیوں میں نشہ آور دوا ایمفیٹامائن کی 90 لاکھ گولیاں سعودی مملکت میں اسمگل کرنے کی کوشش ناکام بنا دی ۔

(جاری ہے)

میڈیارپورٹس کے مطابق سعودی عرب کی وزارت داخلہ کے ایک سکیورٹی ترجمان نے بتایا کہ منشیات کے اسمگلروں نے نشہ آور لاکھوں گولیاں اسمگل کرکے سعودی عرب لانے کی دو مرتبہ کوشش کی تھی لیکن دونوں ملکوں کے حکام نے مشترکہ کارروائیوں اور خفیہ معلومات کے تبادلے کے ذریعے ان دونوں کوششوں کو ناکام بنا دیا ہے۔

متحدہ عرب امارات کے حکام نے ایمفیٹامائن کی 60 لاکھ گولیاں برآمد کر لی ہیں اور دو شامی شہریوں کو گرفتار کر لیا ہے۔ترجمان نے مزید بتایا کہ سعودی عرب اور متحدہ عرب امارات کے حکام نے ایک اور مشترکہ کارروائی میں 30 لاکھ ایمفیٹامائن گولیاں اسمگل کرنے کی کوشش ناکام بنا دی ہے اور انھیں سعودی مملکت کی حدود میں پکڑ لیا ۔دونوں ممالک میں اسمگلنگ کی اس کارروائی کے الزام میں ایک سعودی شہری اور دس شامیوں کو گرفتار کرلیا گیا ہے۔