پاکستان اللہ اور رسول ﷺ کے نام پر حاصل کیا گیا ہمیں کوئی شکست نہیں دے سکتا، آرمی چیف جنرل قمر جاوید باجوہ

فہد شبیر پیر 14 اگست 2017 01:12

لاہور(اُردو پوائنٹ اخبارتازہ ترین۔13اگست۔2017ء) آرمی چیف آف اسٹاف جنرل قمر جاوید باجوہ نے کہا ہے کہ پاکستان اللہ اور رسول ﷺ کے نام پر حاصل کیا گیا ہمیں کوئی شکست نہیں دے سکتا، پاکستان کو قائد اعظم اور علامہ اقبال کا پاکستان بنا کر دم لیں گے، جس طرح آج یہ پرچم بلند ہوا ایسے ہی پاکستان بھی ترقی کرے گا۔واہگہ بارڈر پر منعقدہ تقریب سے خطاب کرتے ہوئے آرمی چیف نے کہا کہ آج الحمداللہ پاکستان ایک مضبوط ملک ہے جو دن بہ دن ترقی کر رہا ہے، آج پاکستان کا ہرادارہ ایمانداری سے کام کررہا ہے اور ہم آئین و قانون کے اصل راستے پر گامزن ہے۔

انہوں نے کہا کہ کارگل کا معرکہ ہو یا دہشت گردی کے خلاف جنگ ہو ہم نے بہت قربانیاں دیں، آج جو چراغ یہاں جل رہے اُن میں شہیدوں کا لہو شامل ہے اور یہ ہم پر قرض بھی ہے۔

(جاری ہے)

جنرل قمر جاوید باجوہ نے کہا کہ دہشت گردوں کو ملک کے کونے کونے سے ڈھونڈ کر ختم کریں گے، پاکستان کے دشمن مغرب یا مشرق میں کہیں بھی ہوں سُن لیں ہم ہوشیار اور ہر سازش سے نمٹنے کے لیے تیار ہیں۔آرمی چیف کا کہنا تھا کہ پاکستان کو اندرونی چیلنجز کا سامنا ضرور ہے مگر پاک فوج اور سیکیورٹی ادارے قوم کو کبھی مایوس نہیں کریں گے، دنیا کے کسی ملک میں ایسی طاقت نہیں کہ پاکستان کی طرف غلط نظر اٹھا کر دیکھے اور اگر کسی نے یہ کرنے کی کوشش کی تو ہم سیسہ پلائی دیوار بن کر کھڑے ہوجائیں گے۔