پنجاب میں میرٹ سکہ رائج الوقت، قوم کے بچوں کواعلی تعلیم کے حصول کیلئے مالی وسائل ..
تازہ ترین : 1

پنجاب میں میرٹ سکہ رائج الوقت، قوم کے بچوں کواعلی تعلیم کے حصول کیلئے مالی وسائل کی مشکلات کو آڑے نہیں آنے دیا جائیگا،شہبازشریف

اگریہ فنڈ70سال قبل بنتا تو آج2 لاکھ کی بجائے 2کروڑ ہونہار بچے تعلیمی پیاس بجھا رہے ہوتے اعلی تعلیم صرف اشرافیہ کا حق بن کررہ گیا تھا،تعلیمی فنڈ نے یہ حق کم وسیلہ بچوں وبچیوں تک پہنچایا ہے،منتخب نمائندوں سے گفتگو

لاہور(اُردو پوائنٹ اخبارتازہ ترین۔ 13 اگست2017ء)وزیراعلیٰ پنجاب محمد شہبازشریف نے کہا ہے کہ جنوبی ایشیاء اور پاکستان کی تاریخ کے سب سے بڑے پنجاب ایجوکیشنل انڈومنٹ فنڈ کے ذریعے ملک بھر کے مالی مشکلات سے دوچار2 لاکھ سے زائدطلبا وطالبات زیور تعلیم سے آراستہ ہورہے ہیں اور اس تعلیمی فنڈکی آمدن سے اب تک 12ارب روپے کے وظائف میرٹ کی بنیاد پر تقسیم کیے جاچکے ہیں ۔

اگریہ تعلیمی فنڈ70سال قبل معرض وجود میں آجاتا تو آج 2لاکھ کی بجائے 2کروڑ سے زائدہونہار بچے اوربچیاں اپنی تعلیمی پیاس بجھا رہے ہوتے۔ وزیراعلی نے منتخب نمائندوں سے گفتگو کرتے ہوئے کہاکہ اعلی تعلیم صرف اشرافیہ کی میراث نہیںبلکہ یہ پاکستان کے ہر بچے کا حق ہے اورپنجاب ایجوکیشنل انڈومنٹ فنڈ کے ذریعے غریب گھرانوں کے ہونہار بچوں پر اعلی تعلیم کے دروازے کھلے ہیںاوراس فنڈسے صرف پنجاب ہی نہیں بلکہ سندھ، بلوچستان، خیبرپختونخواہ،گلگت بلتستان، آزاد کشمیراورپاکستان بھر سے طلبا و طالبات مستفید ہورہے ہیں جس سے قومی یکجہتی اور بھائی چارے کو فروغ ملا ہے -انہوںنے کہاکہ قیام پاکستان کا ایک مقصد سب کو یکساں تعلیمی مواقعوں کی فراہمی بھی ہے اور قیام پاکستان کے اس اہم مقصد کی تکمیل میں یہ فنڈاہم کردار ادا کر رہا ہے۔

انہوںنے کہا کہ پنجاب حکومت نے پنجاب ایجوکیشنل انڈومنٹ فنڈ قائم کر کے قوم کے تابناک مستقبل کی بنیاد رکھ دی ہے اوریہ فنڈ محنت ،امانت اور دیانت کی کامیاب کہانی ہے ۔ جس نے قوم کے غریب بچے بچیوں پر معیاری تعلیم کے دروازے کھول دیئے ہیںاوراس فنڈ سے قوم کے نوجوان ڈاکٹرز، انجینئرز، بینکرز، ٹیچرز بن رہے ہیں اورملک کی تعمیر وترقی میں اپنا بھر پور کردارادا کررہے ہیں ۔

اعلی تعلیم صرف اشرافیہ کا حق بن کررہ گیا تھا جبکہ پنجاب ایجوکیشنل انڈومنٹ فنڈ نے یہ حق کم وسیلہ بچوں اور بچیوں تک پہنچایا ہے ۔ اس فنڈ کے تحت غریب گھرانوں کے ذہین بچے اوربچیا ں ملکی اورغیر ملکی یونیورسیٹوں میں اعلی تعلیم حاصل کررہے ہیں ۔ انہوں نے کہا کہ اشرافیہ کے بچے تودنیا کے بڑے تعلیمی اداروں میں تعلیم حاصل کریں جبکہ غریب کا ہونہار بچہ تعلیم سے محروم رہے،اسی تعلیمی تفاوت کو دور کرنے کیلئے پنجاب ایجوکیشنل انڈومنٹ فنڈ بنایا گیاہے ۔

معاشی تفاوت اسلامی تعلیمات کے خلاف ہے۔ پنجاب ایجوکیشنل انڈومنٹ فنڈ نہ صرف پاکستان کا سب سے بڑا تعلیمی فنڈ ہے بلکہ جنوبی ایشیاء میں ایسا تعلیمی فنڈ موجود نہیں ہے اور پنجاب حکومت نے کم وسیلہ خاندانوں کے ہونہار بچوں او ربچیوں کو اس فنڈ کے ذریعے ان کا حق دیا ہے۔ انہوںنے کہاکہ پنجاب میں میرٹ سکہ رائج الوقت ہے اوردیگر تمام پروگراموں کی طرح تعلیمی فنڈ کے اجراء میں بھی میرٹ کی بالادستی ہے، تمام وظائف صرف اورصرف میرٹ کی بنیاد پر جاری کیے جاتے ہیں،وزیراعلیٰ ، وزیر یا رکن اسمبلی کسی کی سفارش نہیں کرسکتا، یہ وظیفہ صرف اورصرف بچوں کی محنت کی بنیاد پر ہی ملتا ہے اور اس وظیفے سے تعلیم حاصل کرنے والے بچے پاکستان کانام روشن کررہے ہیں ۔

انہوںنے کہاکہ قوم کے بچوں کواعلی تعلیم کے حصول کے لئے مالی وسائل کی مشکلات کو آڑے نہیں آنے دیا جائے گا۔

مزید متعلقہ خبریں پڑھئیے‎ :

وقت اشاعت : 13/08/2017 - 21:01:32

متعلقہ عنوان :

اپنی رائے کا اظہار کریں