چیف آف آرمی سٹاف جنرل قمر جاوید باجوہ کی کوئٹہ بم دھماکے کی شدید مذمت

اتوار 13 اگست 2017 00:30

کوئٹہ ۔ (اُردو پوائنٹ اخبارتازہ ترین - اے پی پی۔ 13 اگست2017ء) چیف آف آرمی سٹاف جنرل قمر جاوید باجوہ نے کوئٹہ بم دھماکے کی شدید مذمت کی ہے۔ انہوں نے کہا ہے کہ دہشتگرد حملے ہمارے حوصلے پست نہیں کر سکتے، دہشتگرد حملہ آزادی کے جشن کو متاثر کرنے کی کوشش ہے، اس طرح کے کسی بھی چیلنج سے ہمارا عزم کمزور نہیں ہوگا۔

(جاری ہے)

ہفتہ کو پاک فوج کے شعبہ تعلقات عامہ (آئی ایس پی آر) کے مطابق چیف آف آرمی سٹاف جنرل قمر جاوید باجوہ نے کوئٹہ میں ہونے والے دہشتگرد حملے میں سیکورٹی فورسز کے اہلکاروں سمیت شہریوں کی شہادت پر گہرے دکھ اور افسوس کا اظہار کیا ہے۔

انہوں نے شہداء کے لواحقین سے اظہار تعزیت اور زخمی ہونے والے افراد کی جلد صحت یابی کیلئے دعا کی ہے۔ آئی ایس پی آر کے مطابق دھماکے میں آرمی کے ٹرک کو نشانہ بنایا گیا جس میں 8 سیکورٹی اہلکاروں سمیت 15 افراد شہید اور 25 زخمی ہوئے، جن میں 10 سیکورٹی اہلکار شامل ہیں۔ دھماکے میں آتش گیر مواد استعمال کیا گیا جس کے نتیجے میں قریبی گاڑیوں میں آگ بھڑک اٹھی۔دھماکے میں زخمی ہونے والوں کو سی ایم ایچ منتقل کر دیا گیا ہے۔ آرمی کی ٹیمیں جائے وقوعہ پر پہنچ گئی اور علاقے کو گھیرے میں لے لیا۔