دریائے سندھ کے پشتوں کی نگرانی کیلئے 16فلڈ واچ کیمپ قائم کر دیئے گئے

لاہور۔ (اُردو پوائنٹ اخبارتازہ ترین۔ 07 اگست2017ء) تونسہ بیراج کے حفاظتی پشتوں کی نگرانی کیلئے 16فلڈ واچ کیمپ قائم کئے گئے ہیں جو 24گھنٹے تونسہ بیراج پہ سیلاب کی صورتحال پہ نظر رکھے ہوئے ہیں،یہ کیمپ بھاری مشینری اور بلڈوزرزسے پوری طرح لیس اور کسی بھی قسم کی ہنگامی صورتحال سے نمٹنے کیلئے مکمل طور پر تیار ہیں ،صوبائی وزیر آبپاشی امانت اللہ خان شادی خیل کے مطابق متعلقہ ایکسیئن نے بتایاکہ اس وقت تونسہ بیراج پہ درمیانے درجے کا سیلاب ہے اور بیراج سے نیچے پانی کا بہائو 392000 کیوسک ہے جبکہ اتوار کو پانی کا بہائو 429000کیوسک تھا اور پانی کی سطح بتدریج کم ہو رہی ہے، محکمہ آبپاشی نے حفاظتی تدابیر کے طور پرڈی جی خان کینال اور مظفر گڑھ کینال کو بند کر دیا ہے تا کہ ان نہروں میں سیلابی پانی کی وجہ سے بھل جمع نہ ہوسکے ،ڈی سی مظفرگڑھ اور ڈی سی لیہ محکمہ آبپاشی کی ٹیموں کے ہمراہ اپنے اپنے علاقے میںدریائے سندھ کے حفاظتی پشتوںکے مسلسل دورے کر رہے ہیں ،محکمہ آبپاشی کا فیلڈ سٹاف ضلعی انتظامیہ سے مکمل رابطے میں ہے تاکہ کسی بھی قسم کی ہنگامی صورتحال سے نمٹنے کیلئے فوری اقدامات کئے جا سکیں۔