اسحاق ڈار ،ْ خواجہ آصف اور احسن اقبال کی جانب سے مبینہ طورپر اقامہ ظاہر نہ کر نے پر ان کے نا اہلی ریفرنس سپیکر کو بھجوادیئے گئے

جمعرات 27 جولائی 2017 17:48

اسلام آباد(اُردو پوائنٹ اخبارتازہ ترین - این این آئی۔ 27 جولائی2017ء) وفاقی وزیر خزانہ سینیٹر اسحاق ڈار، وزیر دفاع خواجہ آصف اور وزیر منصوبہ بندی احسن اقبال کی جانب سے مبینہ طورپر یو اے ای کے اقامے ظاہرنہ کرنے پران کی نااہلی کے ریفرنس اسپیکر قومی اسمبلی کو بھجوائے گئے ہیں۔نجی ٹی وی کے مطابق جوڈیشل ایکٹوازم پینل کی جانب سے اظہرصدیق ایڈووکیٹ نے اسحاق ڈار، خواجہ آصف اور احسن اقبال کو نااہل قراردینے کے لیے اسپیکر قومی اسمبلی سردار ایاز صادق کو ریفرنس بھجوایا ہے۔

(جاری ہے)

ریفرنس میں موقف اختیارکیا گیا کہ اسحاق ڈار، خواجہ آصف اوراحسن اقبال نے اپنے کاغذات نامزدگی میں اپنی بیرون ملک ملازمت کو ظاہرنہیں کیا ،ْ اس کے علاوہ تینوں وزرا نے اپنے کاغذات نامزدگی میں تںخواہ بھی ظاہر نہیں کی۔اسپیکرکے دفتر کو بھجوائے گئے ریفرنس میں کہا گیا کہ اقامہ اور تنخواہ ظاہر نہ کرنے پرتینوں وزرا اسمبلی کی رکنیت کے اہل نہیں رہے۔ عوامی نمائندگی ایکٹ 1976 کے تحت تینوں وزراء کو تین سال سزا ہوسکتی ہے، اس لئے انہیں آئین کے آرٹیکل 63 کے تحت نا اہل قرار دیا جائے۔