عبدالرشید ترابی کی ملائشیا کے سابق وزیر اعظم مردآہن ڈاکٹر مہاتیرمحمد سے ملاقات ،مسئلہ کشمیر سمیت اہم امور پر تبادلہ خیال

مسئلہ کشمیر انسانی مسئلہ ہے عالمی برادری کو اس مسئلے کے حل کے لیے کردار ادا کرنا چاہیے ،مہاتیرمحمد مقبوضہ کشمیر میں بدترین انسانی حقوق کی پامالیوں پر شدید تشویش ہے ‘ہندوستان مظالم بند کرے،عالمی برادری کی ذمہ داری ہے کہ وہ کشمیریوں کو حق دلانے کے لیے اپنا کردار ادا کرے،کشمیریوں کو اقوام متحدہ کی قراردادوں کے مطابق پیدائشی حق فراہم کیا جائے‘ عبدالرشید ترابی

بدھ 26 جولائی 2017 16:16

کوالاالمپور(اُردو پوائنٹ اخبارتازہ ترین - آئی این پی۔ 26 جولائی2017ء) جماعت اسلامی آزاد جموںوکشمیر کے سابق امیر وممبر قانون ساز اسمبلی عبدالرشید ترابی نے ملائشیا کے سابق وزیر اعظم اور مردآہن ڈاکٹر مہاتیر محمد سے ان کی رہائش گا ہ پر اہم ملاقات کی ،ڈاکٹر مہاتیر محمد نے عبدالرشید ترابی کے اعزاز میں ظہرانہ دیا اس موقع پر عبدالرشید ترابی نے ڈاکٹر مہاتیر محمد کو مسئلہ کشمیر کے تاریخی پس منظر ،تحریک آزادی کشمیرمیں کشمیریوں کی قربانیوں اور بھارتی ریاستی دہشت گردی اور مظالم کے حوالے سے بریف کیا ،عبدالرشید ترابی نے ڈاکٹر مہاتیر محمد کو کہا کہ اقوام متحدہ کی سلامتی کونسل کی قراردادوں کے مطابق بھارت پر دبائو بڑھانے کی ضرورت ہے تا کہ وہ ان قراردادوں پر عمل کرے،عبدالرشید ترابی نے کہا کہ کشمیری امت مسلمہ کا حصہ ہیں نریندر مودی ان کو مسلمان ہونے کی سزادے رہا ہے اس لیے عالمی اور اسلامی برادری کی ذمہ داری ہے کہ وہ کشمیریوں کو حق دلائے ،اس موقع پرملائشیا کے سابق وزیر اعظم ڈاکٹر مہاتیر محمد نے عبدالرشید ترابی کو یقین دلایا کہ وہ کشمیریوں کے حق خودارادیت کی بھرپور حمایت کرتے ہیں اور کشمیریوں کو اپنے مستقبل کا فیصلہ کرنے کا حق ملنا چاہیے ملائشیا اقوام متحدہ کی قراردادوں کے مطابق کشمیریوں کے حق خودارادیت کے حصول کے لیے بھرپور تعاون کرے گا ،اس موقع پر عبدالرشید ترابی ڈاکٹر مہاتیر محمد سے دیگر امور پر بھی مشاورت کی ۔