بحران سے نکلنے کیلئے مریم نواز کا چیئرمین پیپلزپارٹی بلاول بھٹو زرداری سے رابطے کا فیصلہ

اتوار 23 جولائی 2017 17:21

بحران سے نکلنے کیلئے مریم نواز کا چیئرمین پیپلزپارٹی بلاول بھٹو زرداری ..
اسلام آباد(اُردو پوائنٹ اخبارتازہ ترین - آن لائن۔ 23 جولائی2017ء) پانامہ کیس میں بحران سے نکلنے کیلئے مریم نواز نے چیئرمین پیپلزپارٹی بلاول بھٹو زرداری سے رابطے کا فیصلہ کرلیا ہے،سیاسی تاریخ میں مریم نواز کا بلاول بھٹو سے پہلا رابطہ ہوگا۔انتہائی معتبر ذرائع سے معلوم ہوا ہے کہ مریم نواز کو خصوصی مشیروں نے مشورہ دیا ہے کہ پانامہ کیس میں پیپلزپارٹی سے پیچھا چھڑانے کیلئے وہ بلاول بھٹو زرداری سے رابطہ کرکے ان سے موجودہ بحران سے نکلنے کیلئے مدد مانگیں،مشورہ پر مریم نواز نے اپنے والد وزیراعظم نوازشریف سے مشاورت اور اجازت کے بعد بلاول سے رابطہ کرنے کی حامی بھرلی ہے۔

ذرائع کے مطابق مریم نواز نے اپنے رفقاء سے بات کرتے ہوئے کہا کہ انہیں امید ہے کہ بلاول بھٹو زرداری جمہوریت کی بقاء کی خاطر انہیں مایوس نہیں کریں گے۔

(جاری ہے)

دوسری جانب پاکستان پیپلزپارٹی کے چیئرمین بلاول بھٹو زرداری نے بھی اپنے رفقاء سے مشورہ کیا ہے کہ اگر سیاسی تاریخ میں پہلی مرتبہ مریم نواز نے رابطہ کرلیا تو وہ ایسا پیغام دینا چاہتے ہیں جو کہ جمہوریت کے حسن کو مزید دوبالا کرے اور رہتی سیاست تک ملک کی دو نامور جماعتوں کے نئے ابھرتے ہوئے سیاستدان پہلے رابطہ پر جمہوریت کیلئے اچھا شگون دیں۔

واضح رہے کہ اس سے قبل چیئرمین بلاول بھٹو زرداری کی سالگرہ پر مریم نواز نے’’ہیپی برتھ ڈے بھائی‘‘ کہہ کر مبارکباد دی تو دوسری جانب بلاول بھٹو نے’’تھینکس بہن‘‘ کہہ کر جواب دیا جو کہ ادب واحترام کے رشتہ کی پہلی سیڑھی پر دونوں جانب ایک ایک قدم دیکھا گیا،اس حوالے سے معتبر سیاستدان خوش آئند قرار دیتے رہے ہیں۔