چین پاکستان کے ساتھ مل کر بھارت پر حملہ کرنا چاہتا تھا ،ْملایم سنگھ کا الزام

حکومت پارلیمنٹ کو بتائے پڑوسی ملک سے ہمیں کیا خطرات ہیں ،ْسابق وزیر دفاع

بدھ 19 جولائی 2017 17:37

چین پاکستان کے ساتھ مل کر بھارت پر حملہ کرنا چاہتا تھا ،ْملایم سنگھ ..
نئی دہلی(اُردو پوائنٹ اخبارتازہ ترین - این این آئی۔ 19 جولائی2017ء) بھارت کے سابق وزیر دفاع ملایم سنگھ یادیو نے کہاہے کہ چین بھارت کا سب سے بڑا حریف ہے ،ْ چین پاکستان کے ساتھ مل کر بھارت پر حملہ کرنا چاہتا تھا۔بھارتی میڈیا رپورٹس کے مطابق بھارتی پارلیمنٹ کے ایوان زیریں (لوک سبھا) میں سماج وادی پارٹی کے سربراہ اور سابق وزیردفاع ملایم سنگھ یادیو نے الزام عائد کیا کہ پاکستان اور چین مل کر بھارت پر حملہ کرنا چاہتے ہیں۔

بھارت اور چین کے درمیان بڑھتی تلخیوں پربات کرتے ہوئے انہوںنے کہاکہ حکومت پارلیمنٹ کو بتائے کہ پڑوسی ملک سے ہمیں کیا خطرات ہیں جبکہ اس حوالے سے حکومت کو برسوں سے آگاہ کررہا ہوں۔ملایم سنگھ یادیو نے کہا کہ بھارت کو سب سے زیادہ خطرہ چین سے ہے، چین نے بھارت پرحملہ کرنے کے لیے پاکستان سے ہاتھ ملا لیا ہے، حکومت نے اس معاملے سے تاحال نمٹنے کیلئے کچھ نہیں کیا جبکہ چین بھارت پرحملہ کرنے کیلئے تیاربیٹھا ہے جس کیلئے چین کی جانب سے جوہری ہتھیارپاکستان میں چھپائے گئے ہیں جس کے بارے میں ایجنسیوں کو بہترعلم ہوگا۔

(جاری ہے)

واضح رہے کہ چین اور بھارت کے درمیان متنازع علاقے سکم میں گزشتہ کئی ہفتوں سے دونوں ملکوں کے درمیان کشیدگی ہے۔ بھارت کی جانب سے الزام تراشیوں اور اشتعال انگیزی کے بعد چین نے بھی سرحدی علاقے میں مشقیں شروع کردی ہیں۔