4سالوں کے دوران بیرونی تجارت میں98.66ارب ڈالر تجارتی خسارہ تشویشناک ہے،راجہ عدیل

لاہور (اُردو پوائنٹ اخبارتازہ ترین - آن لائن۔ 17 جولائی2017ء) تاجر رہنما انجمن تاجران لوہا مارکیٹ شہید گنج (لنڈا بازار)لاہورکے سینئر نائب صدرراجہ عدیل و سابق ایگزیکٹو ممبر لاہور چیمبرز آف کامرس اینڈ انڈسٹری نے کہا ہے کہ4سالوں کے دوران بیرونی تجارت میں 98.66ارب ڈالر تجارتی خسارہ پر تشویش کا اظہار کرتے ہوئے کہا ہے کہ بڑھتا ہوئی تجارتی خسارہ ملکی معیشت کیلئے نقصان ہے اوریہ زرمبادلہ کے ذخائر میں کمی کا باعث ہے ۔

انہوںنے کہا کہ وزارت صنعت و تجارت کی ناقص پالیسیوں،اہم برآمدی صنعتوں کو درپیش مسائل حال نہ ہونے ،سیلز ٹیکس ریفنڈز کی بروقت ادائیگی نہ ہونے سے حکومت برآمدات میں کمی کا سلسلہ روکنے اور درآمدات میں ہونے والے ہوشربا اضافہ کو روکنے میں بری طرح ناکام رہی جس کے باعث 25ارب ڈالر کی سطح سے کم ہوکر 20ارب ڈالر کی سطح پر آگئی۔

(جاری ہے)

ان خیالات کا اظہار انہوںنے آئرن مارکیٹ شہید گنج کے تاجروں کے وفد سے گفتگو کرتے ہوئے کیا۔

راجہ عدیل اشفاق نے کہا کہ تجارتی خسارہ میں کمی کیلئے مثبت پالیسیاں اختیار کی جائیں جن میں صنعتی مقاصد کیلئے بجلی و گیس کی قیمتوں میں کمی کے ساتھ ساتھ تجارتی پالیسی میں مختص اربوں روپے کی رقم استعمال میں لاکر بیرون ملک نئی منڈیوں کی تلاش اور بیرون ملک ملکی مصنوعات کی نمائش کی جائے تاکہ ملکی برآمدات میں اضافہ اور تجارتی خسارہ میں کمی ہوسکے۔