کولمبو ٹیسٹ فیصلہ کن مرحلے میں داخل، آخری روز سری لنکا کو جیت کیلئے 218 رنز اور زمبابوے کو 7 وکٹیں درکار

کولمبو ۔ (اُردو پوائنٹ اخبارتازہ ترین - اے پی پی۔ 17 جولائی2017ء) سری لنکا اور زمبابوے کی کرکٹ ٹیموں کے درمیان کولمبو ٹیسٹ فیصلہ کن مرحلے میں داخل ہوگیا ہے۔ ٹیسٹ کے پانچویں اور آخری روز سری لنکا کو جیت کیلئے 218 رنز اور زمبابوے کو 7 وکٹیں درکار ہیں۔ آئی لینڈرز نے چوتھے روز کھیل کے اختتام پر 388 رنز کے تعاقب میں 3 وکٹوں کے نقصان پر 170 رنز بنا لئے۔

کوسال مینڈس 60 اور اینجلو میتھیوز 17 رنز کے ساتھ وکٹ پر موجود ہیں۔ گریم کریمر نے دو وکٹیں حاصل کیں۔ تفصیلات کے مطابق پیر کو ٹیسٹ کے چوتھے روز زمبابوے کی پوری ٹیم اپنی دوسری اننگز میں 377 رنز بناکر آئوٹ ہوگئی۔ سکندر رضا نے شاندار بیٹنگ کا مظاہرہ کیا اور 127 رنز بنائے۔ دیگر بلے بازوں میں میلکوم والر 68 ، گریم کریمر 48 اور پیٹر مور 40 رنز کے ساتھ نمایاں رہے۔

(جاری ہے)

رنگنا ہیراتھ نے تباہ کن بائولنگ کی اور 6 کھلاڑیوں کو آئوٹ کیا۔ دلروان پریرا نے تین وکٹیں حاصل کیں۔ پہلی اننگز میں 10 رنز کی برتری حاصل کرنے کی وجہ سے زمبابوے نے سری لنکا کو جیت کیلئے 388 رنز کا ہدف دیا۔ سری لنکا نے چوتھے روز کھیل کے اختتام پر 3 وکٹوں کے نقصان پر 170 رنز بنا لئے۔ دیمتھ کرونارتنے 49 ، اپل تھرنگا 27 اور کپتان دنیش چندیمل 15 رنز بناکر آئوٹ ہوئے جبکہ کوسال مینڈس 60 اور اینجلو میتھیوز 17 رنز کے ساتھ ناٹ آئوٹ ہیں۔ گریم کریمر نے دو وکٹیں حاصل کیں۔