بھارتی وزیر ِ زراعت نے مودی کے صاف بھارت پر پیشاب کردیا

وزیر نے اسکول کی عمارت کی دیوار پر پیشاب کیا ، محافظ بھی خود کار ہتھیار لیے کھڑے رہے،میڈیا میں شدید تنقید

اتوار 2 جولائی 2017 11:51

نئی دہلی(اُردو پوائنٹ اخبارتازہ ترین - این این آئی۔ 02 جولائی2017ء) بھارت کے وزیر اعظم نریندر مودی ملک کو صاف ستھرا رکھنے کے لیے مہم چلا رہے ہیں لیکن ان کے ایک وزیر صاحب نے سرعام ان کی ا س مہم کا مضحکہ اڑاتے ہوئے پیشاب کردیا ہے۔ اس غیر شائستہ حرکت پر اب ان کا خوب ٹھٹھا اڑایا جارہا ہے۔بھارتی اخبارنے وزیر زراعت رادھا موہن سنگھ کے ایک دیوار کے ساتھ کھڑے ہوکر پیشاب کرنے کی تصویر اور خبر صفحہ اول پر شائع کی ۔

وزیر زراعت نے کہیں اور نہیں بلکہ ایک اسکول کی عمارت کی دیوار پر پیشاب کیا ۔

(جاری ہے)

ان کے ساتھ ان کے سکیورٹی محافظ بھی خود کار ہتھیار لیے کھڑے تھے۔بھارتی اخبار نے لکھا ہے کہ سنگھ کی یہ تصویر ریاست بہار میں ان کے حلقے میں بنائی گئی ہے۔اس تصویر کے منظر عام پر آتے ہی بھارت کے انٹرنیٹ صارفین نے وزیر زراعت اور حکمراں بھارتیہ جنتا پارٹی ( بی جے پی) کا ٹھٹھا اڑانا شروع کردیا۔ریاست بہار کی ایک علاقائی سیاسی جماعت راشٹریہ جنتا دل نے اپنے ٹویٹ میں اس واقعے پر دلچسپ تبصرہ کیا ہے۔اس نے لکھاکہ یہاں،قحط زدہ علاقے میں قومی وزیر زراعت سخت سکیورٹی میں آب پاشی کی ایک اسکیم کا افتتاح کررہے ہیں۔(انھوں نے بیک وقت دو کام کیے ہیں ) اور صاف بھارت مشن میں بھی اپنا حصہ ڈالا ہے۔