مون سون کے موسم میں آنکھوں کے امراض سے بچے زیادہ متاثر ہوتے ہیں، ڈاکٹر واجد علی

لاہور۔ (اُردو پوائنٹ اخبارتازہ ترین - اے پی پی۔ 27 جون2017ء) الشفاء ٹرسٹ آئی ہسپتال کے میڈیکل سروسز چیف ڈاکٹر واجد علی خان نے کہا ہے کہ مون سون کے موسم میں آنکھوں کی بیماریاں بڑھ جاتی ہیں جس سے بچے زیادہ متاثر ہوتے ہیں، آگہی کی کمی اور سہولیات کے فقدان کی وجہ سے بہت سے افراد بروقت طبی امداد حاصل نہیں کر پاتے جس سے ان کی بینائی متاثر ہوتی ہے،ایسی صورت میں اساتذہ اور والدین بچوں پر خصوصی نظر رکھیں اور کسی بھی شکایت یا علامت کو معمولی نہ سمجھیں۔

’’اے پی پی‘‘ سے گفتگو کرتے ہوئے ڈاکٹر واجد علی خان نے کہا کہ مناسب بینائی بچوں کی نشوو نما اور کسی بھی شخص کو معاشرے کا کارآمد شہری بنا کر رکھنے کیلئے ضروری ہے۔ انھوں نے کہا کہ اس موسم میں بصارت کے بہت سے مسائل کو عام آدمی اس وقت محسوس کرتا ہے جب دیر ہو چکی ہوتی ہے اس لئے ماہر ڈاکٹروں سے معائنہ کروانا ضروری ہے۔

(جاری ہے)

انھوں نے کہا کہ ہر نوزائیدہ بچے کی آنکھوں کا معائنہ ضروری ہے تاکہ کسی بھی مسئلے کی صورت میں جلد علاج کیا جا سکے۔

انھوں نے کہا کہ الشفاٹرسٹ نہ صرف پاکستان میں ڈاکٹروں کو بین الاقوامی معیار کی تربیت فراہم کر رہی ہے بلکہ افغانستان، مصر، بنگلہ دیش اور دیگر ممالک کے ڈاکٹروں اور طبی عملہ کو تربیت دی جا رہی ہے، ہماری کوششوں کی وجہ سے ملک کے ہر ضلع میں الشفاء کا تربیت یافتہ ڈاکٹر موجود ہے۔