صدر آزاد جموں و کشمیر سردار مسعود احمد خان کی امریکہ کی جانب سے حزب المجاہدین کے سربراہ سیّد صلاح الدین کو عالمی دہشت گرد قرار دینے کی شدید مذمت

منگل 27 جون 2017 18:10

راولاکوٹ ۔ (اُردو پوائنٹ اخبارتازہ ترین - اے پی پی۔ 27 جون2017ء) صدر آزاد جموں و کشمیر سردار مسعود احمد خان نے امریکہ کی جانب سے حزب المجاہدین کے سربراہ سیّد صلاح الدین کو عالمی دہشت گرد قرار دینے کی شدید مذمت کی ہے۔ صدر مسعود خان نے کہا کہ حزب المجاہدین کا دہشت گردی سے کوئی تعلق نہیں، تنظیم صرف اور صرف مقبوضہ کشمیر کی آزادی کیلئے سرگرم ہے۔

(جاری ہے)

حزب المجاہدین نے کشمیر کے باہر کبھی کوئی کارروائی نہیں کی اور نہ ہی اس کا کسی دہشت گرد گروپ سے کوئی تعلق رہا ہے۔ سردار مسعود خان نے کہا کہ ٹرمپ مودی گٹھ جوڑ عالمی امن کے لئے سنگین خطرہ ثابت ہو گا۔ امریکہ نے ہمیشہ پاکستان کو دھوکہ دیا ہے، دہشت گردی کے خلاف جنگ میں فرنٹ لائن سٹیٹ ہونے کے باوجود ہماری قربانیوں کا مثبت جواب نہیں دیا گیا۔ مقبوضہ کشمیر میں دہشت گردی قابض بھارتی فوج کر رہی ہے۔ امریکہ کی طرف سے کشمیریوں کی نسل کشی کو نظر انداز کر کے آزادی پسندوں کو دہشت گرد قرار دینا عالمی انسانی اور جمہوری اقدار کے منافی ہے۔