فورٹ منرو میں عیدالفطر کے موقع پر سیاحوں کی دلچسپی کیلئے عید میلہ لگایا جائے گا،کمشنر

ڈی جی خان۔ (اُردو پوائنٹ اخبارتازہ ترین - اے پی پی۔ 23 جون2017ء) کمشنر ڈیرہ غازیخان ڈویژن احمد علی کمبوہ نے کہا ہے کہ صحت افزا مقام فورٹ منرو میں عید الفطر کے موقع پر سیاحوں کی دلچسپی او رانہیں تفریح کے بھر پور مواقع فراہم کرنے کیلئے عید میلہ لگایا جائے گا جس میں مختلف محکموں کے سٹالز کے علاوہ ورائٹی پروگرام ، بلوچی جھومر ، میوزک شو ، اونٹ اور گھوڑ سواری ، بچوں کیلئے جھولے ، کھلونوں کے سٹالز ،بلوچی ملبوسات اورکھانے پینے کے سٹالز لگائے جائیں گے۔

اس کے علاوہ فوڈ سٹریٹ بنائی جائے گی جس میں سیاح مخصوص بلوچی سجی پکوان اور دیگر کھانوں سے لطف اندوز ہوں گے۔ آنے والے سیاحوں کے جان ومال کے تحفظ اور سکیورٹی یقینی بنانے کیلئے فورٹ منروسمیت کسی بھی تفریحی مقام پر مسلح شخص کے داخلے پر پابندی ہوگی۔

(جاری ہے)

ٹریفک کو کنٹرول کرنے کیلئے بارڈر ملٹری پولیس او ربلوچ لیوی کے جوان تعینات کیے جائیںگے۔

گاڑیو ں کی پارکنگ کیلئے مختلف جگہوں پر سٹینڈ بنائے جائیں گے۔ غلط پارکنگ کرنے والوں کے خلاف سخت قانونی کارروائی کرنے اور ان کی گاڑیوں کو پارکنگ سٹینڈ پر منتقل کرنے کیلئے لفٹرمنگوائے جائیں گے۔ اس بات کا فیصلہ ان کی زیر صدارت ہونے والے اجلاس میں کیاگیا جس میںآر پی او رحمت اللہ نیازی ، ڈپٹی کمشنر اللہ رکھا انجم ، ڈی پی او چودھری سجاد حسین گجر ، پی اے جمیل احمد جمیل ، جنرل منیجر فورٹ منرو ڈویلپمنٹ اتھارٹی اسفند یار جنجوعہ ، ایڈیشنل کمشنر کوآرڈینیشن اظفر ضیاء ، سی ای او ہیلتھ ڈاکٹر خلیل احمد سکھانی ، ڈسٹرکٹ آفیسر ریسکیو 1122ڈاکٹر ناطق حیات ، رسالدار بی ایم پی خرم عباس کھوسہ کے علاوہ فورٹ منرو ڈویلپمنٹ اتھارٹی اور دیگر محکموں کے افسران نے شرکت کی۔

کمشنراحمد علی کمبو ہ نے اجلاس سے خطاب کرتے ہوئے کہاکہ فورٹ منرو جنوبی پنجاب کا واحد صحت افزا مقام ہے ․ تفریحی اور دیگر بنیادی سہولیات کے فقدان کی وجہ سے سیاحوں کی دلچسپی میں کمی آئی ہی․ عید الفطر کے موقع پر عید میلے کے انعقاد کا مقصد سیاحوں کی دلچسپی فورٹ منرو جیسے صحت افزا مقام کیلئے بڑھانا ہے۔ انہوںنے کہاکہ آنے والے عوام کو ضروری بنیادی سہولیات کی فراہمی کیلئے فورٹ منرو ڈویلپمنٹ اتھارٹی کے تحت مرحلہ وار ترقیاتی منصوبے مکمل کیے جا رہے ہیں ․ واٹر سپلائی سکیم کی بحالی ، پانی کی مسلسل فراہمی او رآنے والے سیاحوں کی سکیورٹی کیلئے فورٹ منرو کے 13مقامات اور 9چیک پوسٹوں پر سکیورٹی سخت کر دی گئی ہے۔

انہوںنے کہاکہ این 70شاہراہ اور کھر سے فورٹ منرو ، چشمہ ، ڈیمس جھیل او رفورٹ منرو بازار میں بڑی گاڑیوں کی پارکنگ کیلئے علیحدہ جگہ مختص کی جائے گی ․ کمشنر نے پولیٹیکل اسسٹنٹ اور رسالدار سے کہاکہ عید الفطر کے موقع پر ٹرائیبل ایریا میںسکیورٹی کے سخت انتظامات کیے جائیں اورہوٹلوں ، ریستورانوں میں شناخت کے بغیر کسی بھی شخص کو رہنے کی اجازت نہ دی جائے جبکہ ڈائریکٹرہیلتھ کو ہسپتالو ںمیں ڈاکٹروں او رپیرا میڈیکل سٹاف کی حاضری اور سانپ کے کاٹنے کی ویکسین سمیت دیگر ضروری ادویات کی موجودگی کو یقینی بنایا جائی․ عید میلہ کے انتظامات کیلئے فورٹ منرو ڈویلپمنٹ اتھارٹی کے جی ایم اسفند یار جنجوعہ کو فوکل پرسن مقرر کیاگیا ہے۔