وفاقی حکومت کراچی کی ترقی کیلئے ہر ممکن اقدام کر رہی ہے، گورنر سندھ

کراچی (اُردو پوائنٹ اخبارتازہ ترین - این این آئی۔ 21 جون2017ء) گورنر سندھ محمد زبیر نے کہا ہے کہ وفاقی حکومت کراچی کی ترقی کے لیے ہر ممکن اقدام کر رہی ہے ۔ وفاق نے صوبائی حکومت اور میئر کراچی کی مشاورت سے شہر کی ترقی کے لیے بڑے میگا پروجیکٹس شروع کئے ہیں ، جن کی تکمیل کے بعد کراچی کا شمار دنیا کے ترقی یافتہ شہروں میں ہو گا اور شہر قائد کی رونقیں بحال ہوںگی ۔

زرعی یونیورسٹی فیصل آباد میں میڈیا نمائندوں پر تشدد افسوس ناک واقعہ ہے ۔ اس میں ملوث عناصر کے خلاف کارروائی کے لیے حکومت پنجاب سے بات کروں گا ۔ وفاقی حکومت صحافیوں کے تحفظ اور ان کے مسائل کے حل کے لیے ہر ممکن اقدام کرے گی ۔ ان خیالات کا اظہار انہوں نے بدھ کو آرٹس کونسل آف پاکستان کراچی میں کراچی یونین آف جرنلسٹس (کے یو جی)کے افطار ڈنر میں میڈیا سے گفتگو کرتے ہوئے کیا ۔

(جاری ہے)

اس موقع پر میئر کراچی وسیم اختر ، متحدہ قومی موومنٹ پاکستان رابطہ کمیٹی کے رکن امین الحق ، پاک سرزمین پارٹی کے رہنما رضا ہارون اور وسیم آفتاب ، مسلم لیگ (ن)سندھ کے رہنما اسد عثمانی ، جماعت اسلامی کے رہنما زاہد عسکری ، سینئر صحافی طاہر نجمی، سعید خاور، پی ایف یو جے کے جنرل سیکرٹری جی ایم جمالی ، کے یو جے کے صدر حسن عباس ، کے یو جے کے سیکرٹری جنرل واجد رضا اصفہانی ، آرٹس کونسل کے صدر احمد شاہ سمیت اخبارات کے مدیران ، سینئر صحافیوں اور عمائدین شہر نے شرکت کی ۔

گورنر سندھ نے کہا کہ پوری دنیا میں صحافت کے شعبے کو قدر کی نگاہ سے دیکھا جاتا ہے ۔ صحافت ریاست کا چوتھا ستون ہے ۔ پاکستان میں جمہوریت کے استحکام اور تسلسل میں صحافت کا کلیدی کردار ہے اور اس ضمن میں صحافیوں کی قربانیوں کو کسی صورت میں فراموش نہیں کیا جا سکتا ہے ۔ انہوں نے کہا کہ میں سمجھتا ہوں کہ صحافی دایاں بازو ہیں ۔ صحافی حق اور سچ کی آواز ہیں اور معاشرے کی تعمیر و ترقی میں صحافت کا کردار نمایاں ہے ۔

انہوں نے کہا کہ کراچی میں رمضان خیر و عافیت سے گزر رہا ہے اور دعا گو ہیں کہ عید بھی خیر و عافیت سے گزرے ۔ انہوں نے کہا کہ کراچی میں قیام امن کے لیے حکومت اور سکیورٹی ادارے مربوط حکمت عملی کے تحت کام کر رہے ہیں ۔ ایک سوال کے جواب میں انہوں نے کہا کہ گورنر ہاس مسلم لیگ (ن) کا سیاسی اکھاڑا نہیں ہے ۔ میں نے بحیثیت گورنر پیپلز پارٹی ، ایم کیو ایم پاکستان ، جماعت اسلامی ، پی ایس پی سمیت تمام جماعتوں کے رہنماں سے ملاقاتیں کی ہیں ۔

پی ٹی آئی کے رہنما حلیم عادل شیخ کا گورنر ہاس کو سیاسی اکھاڑا قرار دینا افسوس ناک ہے ۔ انہوں نے کہا کہ میں نے خود حلیم عادل شیخ کو فون کیا ہے اور ان کو کہا ہے کہ پی ٹی آئی کا وفد جب گورنر ہاس آنا چاہے ، میں انہیں خوش آمدید کہوں گا یا وہ مجھے بلا لیں ، میں جانے کے لیے تیار ہوں ۔ اگر ان کی جماعت کے سربراہ انہیں مجھ سے ملنے نہیں دیتے تو میں کیا کر سکتا ہوں ۔

انہوں نے کہا کہ میں شہر قائد سمیت صوبہ سندھ کی ترقی کے لیے ہرممکن کردار ادا کرنے اور تعاون کے لیے تیار ہوں ۔ انہوں نے کہا کہ مسائل جھگڑوں سے نہیں بلکہ سے بات چیت سے حل ہوتے ہیں ۔ ہم میئر کراچی اور بلدیاتی نمائندوں کے مینڈیٹ کو تسلیم کرتے ہیں اور وفاقی حکومت نے کراچی کے لیے جو میگا پروجیکٹس شروع کیے ہیں ، اس حوالے سے صوبائی حکومت اور میئر کراچی سے مشاورت کی گئی ہے ۔

ایک سوال کے جواب میں انہوں نے کہا کہ صحافیوں کو تحفظ دینا حکومت کا کام ہے لیکن صحافی اپنے اپنے اداروں سے منسلک ہوتے ہیں ۔ اداروں کا فرض بھی ہے کہ وہ اپنے ملازمین کے مسائل کو حل کرے ۔ تاہم صحافیوں کی فلاح و بہبود کے لیے وفاقی حکومت ہرممکن تعاون کرے گی ۔ انہوں نے کہا کہ زرعی یونیورسٹی فیصل آباد میں ہونے والا واقعہ افسوس ناک ہے ۔ اس حوالے سے پنجاب حکومت سے بات کروں گا اور قانون کے مطابق ملوث عناصر کے خلاف کارروائی کی جائے گی ۔

انہوں نے کہاکہ آج کے یو جے کے افطار ڈنر میں شرکت کرکے خوشی ہوئی ۔ پی ایف یو جے اور کے یو جے صحافیوں کے مسائل کی نشاندہی کرے ۔ ہم مشاورت سے اس کو حل کرنے کی کوشش کریں گے ۔ انہوں نے افطار ڈنر میں مدعو کرنے پر پی ایف یو جے کے جنرل سیکرٹری جی ایم جمالی ، کے یو جے کے صدر حسن عباس اور دیگر ارکان کا شکریہ ادا کیا ۔