صومالیہ میں الشباب کا ہوٹل پر خودکش حملہ،20ہلاک،20یرغمال بناکرلئے گئے

موغادیشو(اُردو پوائنٹ اخبارتازہ ترین - این این آئی۔ 15 جون2017ء) افریقی ملک صومالیہ کے دارالحکومت موغا دیشو میں کل بدھ کے روز ایک ہوٹل میں مسلح افراد نے خود کش حملہ کرکے 20افراد کو ہلاک اور 20 کو یرغمال بنا لیا۔واقعے کے بعد صومالیہ میں سرگرم شدت پسند تنظیم الشباب نے اس کی ذمہ داری قبول کی ہے۔عرب ٹی وی کے مطابق موغادیشو پولیس کے ایک سینئر عہدیدار میجر ابراہیم حسین نے بتایا کہ ایک مبینہ خود کش بمبار نے بارود سے بھری کار دارالحکومت میں واقع ایک ہوٹل سے ٹکرا دی جس کے نتیجے میں20 افراد ہلاک اور55 ہوگئے۔

اس موقع پر پولیس اور مسلح افراد کے درمیان فائرنگ کا بھی تبادلہ ہوا۔ خود کش حملے اور فائرنگ کے تبادلے میں 20افراد کی ہلاکت کی تصدیق کی گئی ہے۔پولیس افسر کا کہناتھا کہ شدت پسندوں نے خود کش حملہ کرکے موغادیشو میں واقع پیزا ہائوس میں افراتفری پھیلانے کی کوشش کی اور ہوٹل میں موجود کم سے کم 20 افراد کو یرغمال بنانے کے بعد نامعلوم مقام پر منتقل کردیا گیا ہے۔

(جاری ہے)

میجر ابراہیم حسین نے بتایا کہ دہشت گردوں کا ہدف بش ٹریٹز ہوٹل تھا۔ یہی وجہ ہے کہ ایک دہشت گرد خود کش بمبار نے بارود سے بھری کار ہوٹل سے ٹکرادی جس کے نتیجے میں ہوٹل کو نقصان پہنچا ہے۔ہوٹل کے پڑوس میں رہنے والے ایک مقامی شہری عباس احمد نے بتایا کہ اس نے خود کش دھماکے کے متعدد بڑی تعداد میں زخمی اور ہلاک ہونے والے افراد کی لاشیں دیکھیں۔انہوں نے بتایاکہ صورتحال قابو میں ہے ،واقعے کے بعد صومالیہ میں سرگرم شدت پسند تنظیم الشباب نے اس کی ذمہ داری قبول کی ہے۔