پولو فیسٹیول گزشتہ سال کی نسبت احسن طریقے سے منعقد کیا جائیگا

فیسٹیول کا انعقاد عید کے بعد ہوگا ،جس کی تاریخوں کا فیصلہ وزیراعلیٰ خیبرپختونخوا کی منظوری کے بعد ہوگا وزیراعلیٰ کے معاون خصوصی سیاحت عبدالمنعیم خان کا شندور میلے کے حوالے سے اعلیٰ سطحی اجلاس میںخطاب

منگل 13 جون 2017 21:49

پشاور(اُردو پوائنٹ اخبارتازہ ترین - آئی این پی۔ 13 جون2017ء) وزیراعلیٰ کے معاون خصوصی برائے سیاحت عبدالمنعیم خان نے کہا کہ شندور پولو فیسٹیول گزشتہ سال کی نسبت مزید احسن طریقے سے منعقد کیا جائے گا اور فیسٹیول کا انعقاد عید کے بعد ہوگا جس کی تاریخوں کا فیصلہ وزیراعلیٰ خیبرپختونخوا کی منظوری کے بعد ہوگا۔تاہم اس موقع پر معاون خصوصی نے پولو گرائونڈ کی تزہین و آرائش، متعلقہ حکام کیساتھ میٹنگ کاانعقاد، واٹرسپلائی ، ٹرانسپورٹ اور دیگر سہولیات کی فراہمی کیلئے متعلقہ حکام کو احکامات جاری کئے،ان کا کہنا تھاکہ گزشتہ سال شندور پولو فیسٹیول کا کامیاب انعقاد کیا گیا جس میں گلگت بلتستان اور چترال کی ٹیموں نے شرکت کی اور اس موقع پر ہزاروں کی تعداد میں ملکی اور غیر ملکی سیاحوں نے ایونٹ دیکھنے کیلئے شندور کا رخ کیا تھا تاہم اس دفعہ بھی کوشش ہے کہ پہلے سے مزید بہتر انداز میں پولو فیسٹیول کا انعقاد کیا جا سکے ،اسکے انعقاد سے دنیا کو امن کا پیغام جائے گا۔

(جاری ہے)

وہ ٹورازم کارپوریشن خیبرپختونخوا کے کانفرنس ہال میں شندور پولو فیسٹیول کے بارے میں منعقدہ ایک اعلیٰ سطحی اجلاس میںکیا، اس موقع پر ان کے ہمراہ ممبر صوبائی اسمبلی سلیم خان، ایم پی اے سردار حسین،کمانڈنٹ چترال سکائوٹس نظام الدین،بریگیڈیئر اقبال ہیڈکوارٹر21ڈویژن ملاکنڈ، طار ق خان سیکرٹری محکمہ سیاحت وکھیل، منیجنگ ڈائریکٹر ٹورازم کارپوریشن مشتاق احمد خان، جی ایم سجاد حمید، ضلع ناظم چترال، صدر پولو ایسوسی ایشن سکندرالملک،اے ڈی سی چترال نورالامین،ڈائریکٹر ہندوکش ٹریلز مقصودالملک،ڈسٹرکٹ ناظم مغفرت شاہ،پی آئی اے کے بلال افضل،ڈی ایس پی چترال ،نمائندہ پی ٹی وی،ہوم ڈیپارٹمنٹ اور سی اینڈڈبلیوکے نمائندے، ڈائریکٹر کلچر اجمل خان سمیت دیگر اہم شخصیات موجود تھیں،معاون خصوصی عبدالمنعیم خان نے کہاکہ ڈی سی چترال اور کمانڈنٹ چترال سکائوٹس شندور پولو فیسٹیول کی تمام سیفٹی امور کو مدنظر رکھنے سمیت فیسٹیول کے انعقاد کیلئے تیاریاں اور دیگر امور کو بھی دیکھیں گے جبکہ گلگت بلتستان کی ضلعی حکومت اور دیگر اہم شخصیات سے فیسٹیول کے انعقاد کے سلسلے میں جلد میٹنگ کا انعقاد بھی کرینگے تاکہ تمام امور کو بہتر طریقے سے سرانجام دیا جا سکے ، اجلاس میںشندور پولو فیسٹیول کے انعقاد کیلئے تاریخوں کا بھی تعین کیا گیا جوکہ 21سے 23جولائی طے پائے تاہم ان تاریخوںکا حتمی فیصلہ وزیراعلیٰ خیبرپختونخوا کرینگے ، اجلاس میں مزید کہاگیا کہ پولو فیسٹیول کے انعقاد سے قبل وہاں پانی کی سپلائی، ملکی سطح پر فیسٹیول کی رونمائی، پمفلٹ اور برائوشرز کی چھپائی،انفراسٹرکچر جس میں سڑکیں،پل اور دیگر راستوں کی تعمیر،گرائونڈ کی تزہین وآرائش و لیولنگ،پاور سپلائی جنریٹر،ٹیلیفون کنکشن،ٹرانسپورٹ سہولیات،الیکٹرانک میڈیا کی کوریج،کھانے پینے کا انتظام،سیکورٹی انتظامات،لوکل ٹرانسپورٹ ،وی وی آئی پیز کیلئے ہیلی کاپٹر سروس اور دیگر سہولیات،شام کے اوقات میں پروگرام جس میں کلچر نائٹ، میوزیک فیسٹیول، آتش بازی وغیرہ،دن کے اوقات میں پیراگلائیڈنگ، چترال ڈانس اور دیگر پرفارمنس،فوڈسٹالز،چترال اور گلگت کی مقامی ثقافتی اشیاء کے سٹالز،ٹینٹ ویلیج کا قیام اور دیگر اہم امور زیر غورآئے ، ان تمام امور کی مکمل تکمیل اور بروقت فراہمی کو یقینی بنانے کیلئے اقدامات اٹھانے کافیصلہ کیا گیا اور یہ بھی فیصلہ ہوا کہ اس کے علاوہ اگر مزید کوئی چیز زیرغور ہوئی تو وہ اگلے اجلاس میں زیر بحث لائی جائے گی۔

متعلقہ عنوان :