جے آئی ٹی میں پیش ہونا وزیراعظم کا بڑا پن ہے، مولانا فضل الرحمن

پیر 12 جون 2017 18:14

اسلام آباد ۔ (اُردو پوائنٹ اخبارتازہ ترین - اے پی پی۔ 12 جون2017ء) جمعیت علماء اسلام (ف) کے سربراہ و رکن قومی اسمبلی مولانا فضل الرحمن نے کہا ہے کہ جے آئی ٹی میں وزیراعظم کا پیش ہونا ان کا بڑا پن ہے، وزیراعظم نے ہمیشہ عدالتوں کا احترام کیا ہے، میں نے عدلیہ کی آزادی کی تحریک کے وقت ایک بات کہی تھی کہ یہ عدلیہ کی آزادی کی جنگ تھی یا ججز کی بحالی کی، اب بھی میرا یہی سوال ہے کہ یہ کرپشن کے خاتمہ کی جنگ ہے یا وزیراعظم کو عہدے سے ہٹانے کی۔

(جاری ہے)

پیر کو پارلیمنٹ ہائوس کے باہر میڈیا سے گفتگو کرتے انہوں نے کہا کہ بجٹ 2017-18ء پر اپوزیشن کی بحث اور تقاریر کو براہ راست دکھانا اتنا بڑا مسئلہ نہیں، ماضی میں پیپلز پارٹی کے دور حکومت میں بھی اپوزیشن کی تقاریر کبھی براہ راست نہیں دکھائی گئیں۔ انہوں نے کہا کہ وزیراعظم نے مناسب سمجھا تو جے آئی ٹی میں جانے کا فیصلہ کیا، جے آئی ٹی میں وزیراعظم کا پیش ہونا ان کا بڑا پن ہے، وزیراعظم نے ہمیشہ عدالتوں کا احترام کیا ہے۔