جے آئی ٹی نے حسین نواز کو (کل) دوبارہ طلب کرلیا

اپنے ہمراہ تمام متعلقہ ریکارڈ ،ْدستاویز، بیانات قلمبند کرانے کیلئے ضروری میٹریل لے کر آئیں ،ْ جے آئی ٹی کا نوٹس

پیر 29 مئی 2017 22:49

جے آئی ٹی نے حسین نواز کو (کل) دوبارہ طلب کرلیا

اسلام آباد (اُردو پوائنٹ اخبارتازہ ترین - این این آئی۔ 29 مئی2017ء) سپریم کورٹ میں حسین نواز کی جانب سے پاناما کیس کی تحقیقات کرنے والی مشترکہ تحقیقاتی ٹیم (جے آئی ٹی) کے دو ارکان پر اٹھایا جانے والا اعتراض مسترد ہونے کے بعد جے آئی ٹی نے وزیراعظم کے صاحبزادے حسین نواز کو (کل)30 مئی منگل کو دوبارہ طلب کرلیا۔جے آئی ٹی کی جانب سے حسین نواز کو جاری کیے جانے والے نوٹس میں کہا گیا کہ وہ (آج)منگل 30 مئی 2017 کو صبح 11 بجے جے آئی ٹی کے دفتر، فیڈرل جوڈیشل اکیڈمی میں رپورٹ کریں۔

نوٹس میں حسین نواز سے کہا گیا کہ وہ اپنے ہمراہ تمام متعلقہ ریکارڈ ،ْدستاویز، بیانات قلمبند کرانے کیلئے ضروری میٹریل لے کر آئیں جیسا کہ انہیں 25 مئی کو جاری ہونے والے نوٹس میں بھی کہا گیا تھا۔

(جاری ہے)

جے آئی ٹی کی جانب سے جاری نوٹس میں حسین نواز کو خبردار کیا گیا کہ اگر انہوں نے نوٹس کی پاسداری نہ کی تو متعلقہ قوانین کے مطابق تعزیری کارروائی کی جائیگی ،ْحسین نواز کو جاری ہونے والے نوٹس میں جے آئی ٹی نے یاد دہانی کرائی کہ حسین نواز کو پہلے 25 مئی کو طلب کیا گیا تھاتاہم وہ پیش نہیں ہوئے تھے جس کے بعد انہیں ایک اور نوٹس جاری کیا اور 28 مئی کو طلب کیا گیا ،ْجے آئی ٹی کے نوٹس میں حسین نواز کو مخاطب کرکے کہا گیا کہ آپ 28 مئی کو جے آئی ٹی کے سامنے پیش ہوئے تاہم کوئی ریکارڈ ساتھ نہیں لائے اور آپ نے جے آئی ٹی کے سوالوں کے جواب دینے سے انکار کیا اور یہ موقف اپنایا کہ آپ نے جے آئی ٹی کے حوالے سے سپریم کورٹ میں درخواست دائر کر رکھی ہے لہٰذا اگلی تاریخ مقرر کی جائے۔

خیال رہے کہ حسین نواز 28 مئی کو جے آئی ٹی میں پیش ہوئے تھے اور جے آئی ٹی کا اجلاس فیڈرل جوڈیشل اکیڈمی میں دو گھنٹے سے زائد جاری رہا تھا۔حسین نواز اپنے وکیل کے ہمراہ تحقیقاتی ٹیم کے سامنے بیان ریکارڈ کرانے کیلئے پیش ہوئے تھے۔