طلبہ قوم کا روشن مستقبل ہیں ہر ممکن تعاون فراہم کریں گے ، گورنر سندھ

کراچی ۔ (اُردو پوائنٹ اخبارتازہ ترین - اے پی پی۔ 24 مئی2017ء) گورنر سندھ محمد زبیر نے کہا ہے کہ جامعہ کراچی میں انفرا اسٹرکچر کی ترقی ، عصری تقاضوں سے ہم آہنگ نصاب اور تحقیق کے شعبوں پر خصوصی توجہ دی جا رہی ہے جبکہ وفاقی حکومت سے بھی درخواست کی گئی ہے کہ جامعہ میں انفرا اسٹرکچر کے لئے تعاون فراہم کرے۔ انہوں نے کہا کہ تعلیم کے ساتھ ساتھ دیگر ہم نصابی سرگرمیاں بھی بہت ضروری ہے اس ضمن میں طلبہ تنظیمیں اہم کردار ادا کررہی ہیں۔

بدھ کو جاری کردہ اعلامیہ کے مطابق ان خیالا ت ا ظہار انہوں نے گورنر ہائوس میں اسلامی جمعیت طلبہ جامعہ کراچی کے ناظم عزیز اختر کی قیادت میں آنے والے 6 رکنی وفد سے گفتگو میں کیا۔ وفد میں سعد رحمان ، شعیب مغل، شہزاد حسین، عاشر احمد اور عزیز علی خان شامل تھے۔

(جاری ہے)

وفد نے گورنر سندھ کو جامعہ میں درپیش مسائل ، طلبہ کی مثبت سرگرمیوں میں حائل رکاوٹوں ، تعلیمی نظام اور عصری تقاضوں سے متعلق تفصیل سے آگاہ کیا۔

گورنر سندھ نے کہا کہ طالب علم قوم کا مستقبل ہیں جو اپنی تعلیم کی تکمیل کے بعد ملک کی تعمیر و ترقی میں حصہ لیتے ہیں اور روشن مستقبل کی ضمانت ہیں ، حکومت طلبہ کو ہر ممکن تعاون فراہم کرے گی۔ انہوں نے کہا کہ آج کی ترقی میں تعلیم، تحقیق اور ٹیکنالوجی کا اہم کردار ہے اور اس کے لئے جامعات معاون و مفید ثابت ہو رہی ہیں، جامعہ کراچی سے فارغ التحصیل طالب علم ملک کی ترقی میں بھرپور کردار ادا کر رہے ہیں۔