عدالت عمران خان سے منی ٹریل اور فارن فنڈنگ کا جواب مانگتی ہے تو کہتے ہیں ہمارا ..
تازہ ترین : 1

عدالت عمران خان سے منی ٹریل اور فارن فنڈنگ کا جواب مانگتی ہے تو کہتے ہیں ہمارا مقدمہ الیکشن کمیشن میں زیر سماعت ہے

جب الیکشن کمیشن فارن فنڈنگ کا جواب طلب کرتی ہے تو کہتے ہیں کہ ہمارا مقدمہ تو عدالت میں زیر سماعت ہے رکن قومی اسمبلی طلال چوہدری کی میڈیا سے گفتگو

اسلام آباد ۔ (اُردو پوائنٹ اخبارتازہ ترین۔ 23 مئی2017ء) مسلم لیگ(ن) کے رہنما طلال چوہدری نے کہا ہے کہ عدالت تحریک انصاف کے چئیرمین عمران خان کی منتظر رہی مگر وہ پیش نہیں ہوئے،جب عدالت عمران خان سے منی ٹریل اور فارن فنڈنگ کا جواب مانگتی ہے تو کہتے ہیں ہمارا مقدمہ الیکشن کمیشن میں زیر سماعت ہے ہمیں وہاں جواب دینے جانا ہے اور جب الیکشن کمیشن ان سے منی ٹریل اور فارن فنڈنگ کا جواب طلب کرتی ہے تو عمران خان کہتے ہیں کہ ہمارا مقدمہ تو عدالت میں زیر سماعت ہے ہمیں وہاں جواب دینا ہے۔

عدالت کے باہر میڈیا سے گفتگو کرتے ہوئے انہوں نے کہا کہ پہلے عمران خان عوام کو تبدیلی کے نام پر چکر دیتے رہے ہیں،اب عدالت اور الیکشن کمیش کو چکر دے رہے ہیں،انہوں نے کہا کہ عمران خان جو دعوی کرتے تھے کہ میں ہر چیز کا حساب دینے کے لئے تیار ہوں اور کبھی فرار نہیں ہوں گے آج وہ تلاشی دینے سے انکاری ہیں اور فرار ہوتے ہوئے دکھائی دیتے ہیں،انہوں نے کہا شریف برداران سے تو تین نسلوں کا حساب مانگا جو انہوں نے سینا تان کر دیا،،عمران خان سے تو گزشتہ پانچ سال کا حساب مانگا گیا ہے وہ بھی وہ نہیں دے پا رہے۔

انہوں نے کہا کہ عمران خان صرف بڑی بڑی باتیں کرنا ہی جانتے ہیں، عمران خان ابھی تو حنیف عباسی کی دائر کردہ پیٹشن کے پہلے فارن فنڈنگ کے الزام کا جواب نہیں دے پا رہے،پیٹیشن کے باقی 4 الزامات کا کیسے جواب دیں گے،انہوں نے کہا کہ اب چند ہی دن رہ گئے عدالت کوئی مناسب فیصلہ کرے گی،انہوں نے کہا کہ عمران خان جو فرشتہ صفت بنے پھرتے ہیں جلد ہی ان کی حقیقی تصویر عوام کے سامنے آ جائے گی۔انہوں نے مزید کہا کہ عمران خان کو جواب دینا پڑے گا اور ہم جواب لینا جانتے ہیں۔

مزید متعلقہ خبریں پڑھئیے‎ :

وقت اشاعت : 23/05/2017 - 18:12:01

اس خبر پر آپ کی رائے‎