ْگلگت، پاکستان انڈسٹریل اینڈ ٹیکنیکل اسسٹنس سنٹر کے زیراہتمام 5روزہ تربیتی ورکشاپ کا آغاز

گلگت (اُردو پوائنٹ اخبارتازہ ترین - آئی این پی۔ 22 مئی2017ء) پاکستان انڈسٹریل اینڈ ٹیکنیکل اسسٹنس سنٹر کے ریجنل آفس گلگت اور محکمہ سوشل ویلفیئر کے تعاون سے سوشل ویلفیئر آفیسران کے لیے پانچ روزہ تربیتی سیشن کا آغاز گلگت کے ایک مقامی ہوٹل میں ہوا، اس سیشن کا افتتاح ڈپٹی ڈائیریکٹر سوشل ویلفیئر ڈپارٹمنٹ محمد یوسف نے کیا، فنانشل مینیجمنٹ ،پروپوزل رائٹینگ، پراجیکٹمینجمنٹ ،آفس نوٹنگ و ڈرافٹنگ اور رولز آف بزنس آف گورنمنٹ جیسے اہم موضوع پر یہ تربیتی سیشن پانچ دن تک جاری رہے گا، اس تربیتی سیشن کے لیئے قراقرم انٹرنیشنل یونیورسٹی کے مایہ ناز ماہر تعلیم اسسٹنٹ پروفیسر محمد الیاس اور نوشین مغل کی خدمات حاصل کی گئی ہیں۔

(پی آئی ٹی اے سی )کے ریجنل انچارج محمد سہیل نے بتا یا کہ ان کا ادارہ حکومت گلگت بلتستان کے ادروں میں افرادی قوت کی استعداد کار بڑھانے کے لیئے مختلف نوعیت کی ٹریننگ اور ورکشاپس کا انعقاد کرتا رہتا ہے۔

(جاری ہے)

انہوں نے مزید بتایا کہ ان تربیتی سیشنز کیلئے نہ صرف مقامی طور پر دستیاب اعلی ٹرینرز کا انتخاب کیا جارہا ہے بلکہ ان کا ادرہ ملک بھر سے مختلف کورسز کے انعقاد کے لیے ماسٹر ٹرینرز اور ماہرین سے استفادہ کرتا ہے۔

ان کے ادرے کی کوشش ہے کہ مقامی محکموں میں کام کرنیوالے ملازمین کو اعلی فنی و تکنیکی تعلیم کے لیے اسلام آباد اور ملک کے دیگر شہروں کا رخ نا کرنا پڑے بلکہ ان افراد کے لیئے اپنے شہر میں ہی ایسے تربیتی کورسز کا اہتمام کیا جا سکے۔اس موقع پر ڈپٹی ڈائیرکٹر سوشل ویلفیئر ڈپارٹمنٹ محمد یوسف نے بتایا کہ مقامی سطح پر اس طرز کی ٹریننگ کے انعقاد سے وقت اور پیسے دونوں کی بچت کی جا سکتی ہے اور قلیل مدت میں ہی ان کے آفیسرز تربیتی سیشن سے بھرپور فائدہ اٹھا سکتے ہیں۔