آصف علی زرداری نے ہری پور آمد کی دعوت قبول کر لی ہے، ڈاکٹر شائستہ رزاق

جمعہ 19 مئی 2017 16:57

ہری پور۔ (اُردو پوائنٹ اخبارتازہ ترین - اے پی پی۔ 19 مئی2017ء) پاکستان پیپلز پارٹی شعبہ خواتین کی سابق صدر ڈاکٹر شائستہ رزاق نے کہا ہے کہ سابق صدر پیپلز پارٹی کے شریک چیئرمین آصف علی زرداری نے ہری پور آمد کی دعوت قبول کر لی ہے۔

(جاری ہے)

جمعہ کو اپنے ایک بیان میں انہوں نے کہا کہ پشاور آمد پر جب ان کی ملاقات سابق صدر آصف علی زرداری سے ہوئی تو انہوں نے انہیں ہری پور آمد کی دعوت دی جو انہوں نے قبول کر لی اور وعدہ کیا کہ وہ عید الفطر کے بعد جلد ہی ہری پور کا دورہ کریں گے۔

انہوں نے کہا کہ سابق صدر کا کہنا تھا کہ دورہ ہری پور میں ان کے ساتھ پارٹی کے چیئرمین بلاول بھٹو بھی ہوں گے۔ واضح رہے کہ سابق صدر پیپلز پارٹی کے کو چیئرمین آصف علی زرداری کی ہری پور آمد کی دعوت قبول کرنے کے بعد ہری پور کے جیالوں میں خوشی کی لہر دوڑ گئی ہے، جیالوں کا کہنا ہے کہ ہم شریک چیئرمین آصف علی زرداری اور پارٹی چیئرمین بلاول بھٹو کو دل کی اتھا گہرائیوں سے ہری پور آمد پر خوش آمدید کہیں گے۔