ایم کیوایم پاکستان نے بلدیاتی اختیارات کیلئے سپریم کورٹ میں درخواست دائر کردی

ْ میئر اور بلدیاتی ادارے نمائشی ہیں، سارے وسائل اور اختیارات صوبے کے پاس ہیں، فاروق ستار

جمعرات 27 اپریل 2017 13:53

ایم کیوایم پاکستان نے بلدیاتی اختیارات کیلئے سپریم کورٹ میں درخواست ..

اسلام آباد(اُردو پوائنٹ اخبارتازہ ترین - آئی این پی۔ 27 اپریل2017ء) ایم کیو ایم پاکستان نے سپریم کورٹ میں پٹیشن دائر کردی جس میں استدعا کی گئی ہے کہ صوبائی حکومت سے اختیارات اور وسائل بلدیاتی اداروں اور میئر کو منتقل کئے جائیں۔ایم کیو ایم پاکستان کے سربراہ فاروق ستار نے سپریم کورٹ میں پٹیشن دائر کی جس میں عدالت سے استدعا کی گئی ہے کہ سندھ حکومت اختیارات اور وسائل بلدیاتی اداروں اور میئر کو منتقل کرے۔

(جاری ہے)

سپریم کورٹ کے باہر میڈیا سے بات کرتے ہوئے فاروق ستار کا کہنا تھا کہ ہم نے اپنی درخواست میں عدالت سے استدعا کی ہے کہ آئین کے آرٹیکل 144 اے کی روح کے مطابق اختیارات اور وسائل سندھ حکومت بلدیاتی اداروں اور میئر کو منتقل کیے جائیں، آرٹیکل 140 (ای) پرعمل کیا جائے، اختیار صوبے سے بلدیاتی اداروں اور کونسل کو منتقل کئے جائیں۔ فاروق ستار کا کہنا تھا کہ سندھ کا نام نہاد بلدیاتی نظام بہت بڑا فریب ہے، میئر اور بلدیاتی ادارے نمائشی ہیں کیونکہ سارے وسائل اور اختیارات صوبے کے پاس ہیں، اختیارات صوبوں سے نچلی سطح پر منتقل کئے جائیں جب کہ اختیارات کو گلیوں اور محلوں تک پہنچایا جاسکتا ہے۔