چیئرمین سینیٹ نے طیبہ تشدد کیس کی سماعت کے دوران گھریلو ملازمین کے حقوق کے بل 2016 ء سے متعلق استفسار کی میڈیا رپورٹس کا نوٹس لے لیا

بدھ 26 اپریل 2017 18:50

اسلام آباد ۔ (اُردو پوائنٹ اخبارتازہ ترین - اے پی پی۔ 26 اپریل2017ء) چیئرمین سینیٹ میاں رضاربانی نے عدالت عظمیٰ کی جانب سے طیبہ تشدد کیس کی سماعت کے دوران گھریلو ملازمین کے حقوق کے بل 2016 سے متعلق استفسار کی میڈیا رپورٹس کا نوٹس لیتے ہوئے سینیٹ سیکرٹریٹ کو ہدایت کی ہے کہ وہ سپریم کورٹ کو اصل صورتحال سے آگاہ کرے۔

(جاری ہے)

گزشتہ روز یہاں جاری بیان میں انہوں نے کہا کہ گھریلو ملازمین کے حقوق کا یہ بل پرائیوٹ ممبر بل کے طور پر سینیٹرعثمان سیف اللہ خان نے متعارف کرایا تھا اور قواعدو ضوابط کے مطابق بل کا جائزہ لینے کیلئے سینیٹ قائمہ کمیٹی برائے سمند رپار پاکستانیزو انسانی وسائل کی ترقی کو بھیجا گیا۔

قائمہ کمیٹی نے بل کا تفصیل سے جائزہ لیااور 11 فروری 2016 کو متفقہ طو ر پر بل کو منظور کرتے ہوئے 7 مارچ2016ء کو اس حوالے سے رپورٹ سینیٹ اجلاس میں پیش کر دی۔ ایوان بالاء نی9 مارچ2016ء کو یہ بل قومی اسمبلی کو بھیج دیا ۔ جہاں قومی اسمبلی کے ایک رکن نے بل کو زیر غور لانے کیلئے نوٹس بھی دیا۔ رجسٹرار کے ذریعے اس بل کی موجودہ حقیقی صورتحال کے متعلق معزز عدالت کو آگاہ کر دیاگیاہے ۔