لاہور ہائی کورٹ کا 4 ماہ میں سوشل میڈیا پر تمام توہین آمیز مواد ہٹانے کا حکم

وزارت خارجہ ،آئی ٹی کے متعلقہ حکام سے رپورٹ بھی طلب کرلی

منگل 25 اپریل 2017 17:52

لاہور ہائی کورٹ کا 4 ماہ میں سوشل میڈیا پر تمام توہین آمیز مواد ہٹانے ..

لاہور(اُردو پوائنٹ اخبارتازہ ترین - آن لائن۔ 25 اپریل2017ء) لاہور ہائیکورٹ نے سوشل میڈیا سے چار ماہ میں تمام توہین آمیز مواد ہٹانے کا حکم دے دیا ہے اور وزارت اطلاعات، وزارت خارجہ اور آئی ٹی کے متعلقہ حکام سے رپورٹ بھی طلب کر لی۔ لاہور ہائیکورٹ کے جسٹس عاطر محمود نے ظفر اقبال کی درخواست پر سماعت کی جس میں سوشل میڈیا سے توہین آمیز مواد کی نشاندہی کی گئی۔

(جاری ہے)

درخواست گزار کے وکیل نے بتایا کہ عدالتی احکامات کے باوجود سوشل میڈیا پر توہین آمیز نہیں ہٹایا گیا۔ عدالتی احکامات پر عمل نہ کرنا توہین عدالت کے زمرے میں آتا ہے۔ درخواست گزار کے وکیل نے استدعا کی کہ فیس بک، یوٹیوب اور دیگر سوشل میڈیا پر موجود توہین آمیز مواد فوری طور پر ہٹانے کا حکم دیا جائے اور اگر مواد نہ ہٹایا جائے تو تمام سوشل میڈیا پر پاکستان میں پابندی لگائی جائے۔ (ایم خالد)