سفید ٹوپی والے مولوی نے پیپلز پارٹی اور تحریک انصاف میں نکاح پڑھا دیا ہے، عابد شیر علی

جمعہ 21 اپریل 2017 16:27

اسلام آباد(اُردو پوائنٹ اخبارتازہ ترین - آن لائن۔ 21 اپریل2017ء) وزیرمملکت برائے پانی و بجلی عابد شیر علی نے کہا ہے کہ پاناما فیصلہ کے بعد سفید ٹوپی والے مولوی نے پیپلز پارٹی اور تحریک انصاف میں نکاح پڑھا دیا ہے، پیپلزپارٹی اپنی جے آئی ٹی چاہتی ہے جس کا سربراہ آصف زرداری اور ممبران ایان علی ،شرجیل میمن ہوں۔ انہوں نے قومی اسمبلی کے باہر میڈیا سے گفتگو کرتے ہوئے کہا کہ اپریل کا دن پاکستان کے عوام کے لئے خوشی کا دن تھا،گزشتہ روز حق اور سچ کا فیصلہ آیا اور ہماری بہن مریم نواز کو کلین چٹ مل گئی جس سے ثابت ہوگیا کہ ان کا دامن صاف ہے۔

انہوں نے کہاکہ پاناما کیس نے ایک دوسرے کے دشمن پیپلزپارٹی، تحریک انصاف اور جماعت اسلامی کو آپس میں جوڑ دیا اور سب مل کر ہمارے خلاف ہو گئے ہیں لیکن اپوزیشن جماعتیں کچھ بھی کرلیں، 2018 کے انتخابات میں (ن) لیگ ہی کامیاب ہو گی اور نوازشریف ہی ملک کے وزیراعظم ہوں گے۔

(جاری ہے)

پیپلزپارٹی سر سے پاؤں تک کرپشن میں ڈوبی ہوئی ہے جب کہ پی پی رہنماؤں کا وطیرہ ہے کہ وہ سپریم کورٹ کے فیصلوں کو نہیں مانتی، اور عدالتوں کا احترام نہیں کرتی۔ اب انہوں نے ملک کی سب سے بڑی عدالت کی جانب سے جے آئی ٹی کے فیصلے کو بھی ماننے سے انکار کردیا ہے، پیپلزپارٹی اپنی جے آئی ٹی تشکیل دے اور اس کا سربراہ آصف زرداری کو بنا کر ایان علی اور شرجیل میمن کو اس کا ممبر بنا دیں۔