آرمی چیف سے ملاقات میں کہا تھا کہ ہم 2013جیسے انتخابات نہیں ہونے دیں گے ، ان سے کہا الیکشن میں نہیں بلکہ صاف شفاف الیکشن میں اصلی جمہوریت ہے جس پر انہوں نے کہا کہ ہم شفاف الیکشن میں آپ کی بھرپور مدد کریں گے ، آرمی چیف سے ایک گھنٹے کی ملاقات ہوئی تھی اور ملاقات کی درخواست میں نے کی تھی ، ان سے جنرل (ر) راحیل شریف کی سعودی اتحاد میں تعیناتی پر بھی گفتگو ہوئی ، فاٹا کے انضمام اور پاک افغان بارڈر کی بندش کے معاملے پر بھی آرمی چیف سے بات چیت ہوئی، مردان میں مذہب کے نام پر قتل کے واقعہ کے بعد لوگوں میں خوف پیدا ہوگیا ہے ،مشال خان کے قتل کی تہہ تک جائیں گے اور واقعہ میں ملوث ملزمان کو قرارواقعی سزائیں ملیں گی ، مشال کی تعزیت کیلئے خود جائوں گا ، اس کا کوئی قصور نہ تھا

اسلام آباد(اُردو پوائنٹ اخبارتازہ ترین - آئی این پی۔ 17 اپریل2017ء) پاکستان تحریک انصاف کے چیئرمین عمران خان نے کہا ہے کہ آرمی چیف سے ملاقات میں کہا تھا کہ ہم 2013جیسے انتخابات نہیں ہونے دیں گے ، ان سے کہا الیکشن میں نہیں بلکہ صاف شفاف الیکشن میں اصلی جمہوریت ہے جس پر انہوں نے کہا کہ ہم شفاف الیکشن میں آپ کی بھرپور مدد کریں گے ، آرمی چیف سے ایک گھنٹے کی ملاقات ہوئی تھی اور ملاقات کی درخواست میں نے کی تھی ، ان سے جنرل (ر) راحیل شریف کی سعودی اتحاد میں تعیناتی پر بھی گفتگو ہوئی ، فاٹا کے انضمام اور پاک افغان بارڈر کی بندش کے معاملے پر بھی آرمی چیف سے بات چیت ہوئی، مردان میں مذہب کے نام پر قتل کے واقعہ کے بعد لوگوں میں خوف پیدا ہوگیا ہے ،مشال خان کے قتل کی تہہ تک جائیں گے اور واقعہ میں ملوث ملزمان کو قرارواقعی سزائیں ملیں گی ، مشال کی تعزیت کیلئے خود جائوں گا ، اس کا کوئی قصور نہ تھا۔

(جاری ہے)

وہ پیر کو نجی ٹی وی کو انٹرویو دے رہے تھے ۔انہوں نے کہا کہ آرمی چیف جنرل قمر جاوید باجوہ سے پہلے کبھی نہیں ملا تھا، افغان سفیرسے ملاقات کے بعد آرمی چیف سے ملاقات کی درخواست کی تھی جو انہوں نے قبول کر لی،ان سے ایک گھنٹے تک ملاقات ہوئی جس میں مختلف موضوعات پر گفتگو کی گئی ، میں نے آرمی چیف سے انتخابات سے متعلق بھی بات کی اور کہا کہ ہم 2013جیسے انتخابات نہیں ہونے دیں گے ، ان سے کہا الیکشن میں نہیں بلکہ صاف شفاف الیکشن میں اصلی جمہوریت ہے جس پر انہوں نے کہا کہ ہم شفاف الیکشن میں آپ کی بھرپور مدد کریں گے ۔

عمران خان نے کہا کہ آرمی چیف سے جنرل (ر) راحیل شریف کی سعودی اتحاد میں تعیناتی پر بھی گفتگو ہوئی امید ہے کہ جنرل راحیل شریف کی سربراہی میں ایران اور سعودی عرب دونوں ملک ایک دوسرے کے قریب آئیں گے ، فاٹا کے انضمام اور پاک افغان بارڈر کی بندش کے معاملے پر بھی آرمی چیف سے بات چیت ہوئی،افغان سرحد بند ہونے سے سب سے زیادہ نقصان خیبرپختونخوا کو ہوتا ہے۔

ملاقات میں آرمی چیف نے کہا کہ وہ جمہوریت پر یقین رکھتے ہیں اور بحیثیت ادارہ چاہیں گے کہ شفاف انتخابات ہوں اور جمہوریت آگے بڑھے۔ عمران خان نے کہا کہ مشال خان قتل کی تہہ تک جائیں گے اورکیس میں ملوث ملزمان کوسزائیں ملیں گی،اس واقعہ پر لوگوں میں خوف پیدا ہوگیا ہے ۔انہوں نے کہا کہ یہ ایسا ہی ہے جیسے کوئی میرا جعلی بلاگ بنادے اورتوہین کردے اورمجھے ماردے اس میں انصاف کے تقاضے کہیں پورے نہیں ہوں گے ،جس پرالزام لگتا ہے اس کو صفائی کا موقع دیا جانا چاہیے، میں مشال خان کے واقعے کو پورا سمجھنا چاہ رہا تھا اور قتل کی پوری معلومات جاننا چاہ رہا تھا ، آئی جی خیبرپختونخوا سے بات ہوئی ہے، کئی باتیں سامنے آئی ہیں، مشال خان کا کوئی قصور نہیں تھا۔

پی ٹی آئی چیئرمین نے کہا کہ مردان واقعے کے بعد پورے ملک میں ایک اتفاق رائے پیدا ہوگیا، اے پی ایس واقعے کے بعد پوری قوم اکٹھی ہوگئی تھی اورنیشنل ایکشن پلان بن گیا تھا،مشال خان کے خاندان سے تعزیت کرنی(آج) جاؤں گا ۔