پی ٹی آئی نے نیشنل بینک کے صدر سے استعفیٰ مانگ لیا

کراچی(اُردو پوائنٹ اخبارتازہ ترین - این این آئی۔ 29 مارچ2017ء) پاکستان تحریک انصاف نے نیشنل بینک کے نئے صدر سعید احمد سے مستعفی ہونے کا مطالبہ کیاہے اور کہا ہے کہ وہ منصب سے الگ نہ ہوئے تو ان کے خلاف منصوبہ بندی شروع کردیں گے۔اطلاعات کے مطابق تحریک انصاف نے نیشنل بینک آف پاکستان کے صدر سعید احمد کو خط لکھا ہے جس میں مطالبہ کیا ہے کہ وہ فوری طور پر اپنے عہدے سے مستعفی ہوجائیں کیوں کہ وہ منی لانڈرنگ میں ملوث ہیں۔

(جاری ہے)

خط پی ٹی آئی رہنما عمران اسماعیل کی جانب سے تحریر کیا گیا ہے، جس میں نیشنل بینک آف پاکستان کے صدر کو مخاطب کرتے ہوئے کہا گیا ہے کہ آپ کی تقرری پر پوری قوم نے ناگواری کا اظہار کیا ہے منی لانڈرنگ کیس میں ملوث ہونے کے سبب آپ کسی بھی قومی کردار کے لیے موزوں نہیں ہیں۔عمران اسماعیل نے کہا ہے کہ وزیر خزانہ نے اقرار کیا کہ آپ نے منی لانڈرنگ میں ان کی معاونت کی، اور صدر کا عہدہ سیاسی رشوت کے تحت دیا گیا اس لیے فی الفور نیشنل بینک کی صدارت سے اپنے آپ کو الگ کریں۔انہوں نے صدر نیشنل بینک کو خبردار کیا کہ وہ منصب سے الگ نہ ہوئے تو ان کے احتساب کے لیے پاکستان تحریک انصاف بھرپور منصوبہ بندی کرے گی۔