عوام سوشل میڈیا، ویب سائٹس اور موبائل فون پر پیغامات کے ذریعے دھوکہ دہی کی سکیموں سے بچیں، ایس ای سی پی

پیر 27 مارچ 2017 17:21

اسلام آباد ۔ (اُردو پوائنٹ اخبارتازہ ترین - اے پی پی۔ 27 مارچ2017ء) سکیورٹیز اینڈ ایکسچینج کمیشن آف پاکستان نے عوام کو خبردار کیا ہے کہ سوشل میڈیا، ویب سائٹوں اور موبائل فون پر پیغامات کے ذریعے دھوکہ دہی کی سکیموں سے بچیں اور اپنا سرمایہ محفوظ اور منظور شدہ سکیموں میں ہی لگائیں۔ پیر کو ایس ای سی پی کی جانب سے جاری ایک بیان میں کہا گیا ہے کہ کمیشن کے علم میں آیا ہے کہ فیس بک پر ایک صفحہ بنایا گیا ہے اور عوام میں پھیلایا جا رہا ہے جس میں گروہی سرمایہ کاری کے تصور کی تشریح کی گئی اور اس کی دیگر تفصیلات دی گئی ہیں۔

اس پیج کا عنوان انوویٹو کراؤڈ فنڈنگ پراجیکٹ پرائیویٹ لمیٹڈ پاکستان ہے۔ اس فیس بیک اکاؤنٹ سے شبہ ہوتا ہے کہ یہ کمپنی عوام سے فنڈز اکٹھا کرنے میں ملوث ہے۔

(جاری ہے)

اس حوالے سے ایس ای سی پی واضح کرنا چاہتا ہے کہ اس نام کی کوئی کمپنی اس کے ساتھ رجسٹرڈ نہیں ہے اور مزید وضاحت کی جاتی ہے کہ پاکستانی قوانین کے مطابق ملک میں گروہی فنڈنگ ممنوع ہے اور کسی کمپنی کو اس سکیم کے ذریعے فنڈ اکٹھا کرنے کی اجازت نہیں ہے۔

اس حوالے سے عوام الناس کو تنبیہ کی جاتی ہے کہ کچھ رجسٹرڈ‘ غیر رجسٹرڈ اداروں یا افراد کی جانب سے سوشل میڈیا، ویب سائٹوں اور موبائل فون پر پیغامات کے ذریعے پھیلائی جانے والی اس قسم کی دھوکہ دہی کی سکیموں سے بچیں اور اپنا سرمایہ محفوظ اور منظور شدہ سکیموں میں ہی لگائیں۔