پاکستان ریلوے نے مسافروں کو بہتر سفری سہولیات کی فراہمی کے لیے مزید 31 ریلوے اسٹیشنوں کی بحالی اور تزئین و آرائش کی منصوبہ بندی کرلی

کراچی(اُردو پوائنٹ اخبارتازہ ترین - این این آئی۔ 27 مارچ2017ء) پاکستان ریلوے نے مسافروں کو بہتر سفری سہولیات کی فراہمی کے لیے ملک بھر میں مزید 31 ریلوے اسٹیشنوں کی بحالی اور تزئین و آرائش کی منصوبہ بندی کرلی ہے۔اس ضمن میں وزارت ریلوے کے ذرائع نے بتایا کہ بہاولپور، اوکاڑہ، ساہیوال، رائیونڈ، نارروال، ننکانہ صاحب اور حسن ابدال اسٹیشنوں کی تعمیر نو کا کام جاری ہے جبکہ 31 اسٹیشنوں کی تزئین و آرائش اور بنیادی سفری سہولیات کی فراہمی کے لیے منصوبے کو حتمی شکل دی جارہی ہے۔

(جاری ہے)

انہوں نے بتایا کہ پاکستان ریلوے نے موجودہ حکومت کے دور میں ریلوے اسٹیشنز کی مرمت، تزئین و آرائش اور تعمیر نو پر 45 کروڑ، 12 لاکھ، 56 ہزار روپے خرچ کیے۔انھوں نے بتایا کہ موجود حکومت نے لودھراں سے کوٹری سیکشن پر سگنل سسٹم کی بحالی کے لیے بھی 38 ارب، 26 کروڑ، 29 لاکھ، 91 ہزار روپے خرچ کیے۔ذرائع کے مطابق لودھراں سے شاہدرہ اور میرپور ماتھیلو سے شاہدرہ کے ٹریفک سگنلز بھی موجودہ حکومت نے ہی شروع کیے، جنھیںبیمار منصوبے قرار دیا گیا تھا۔انہوں نے کہاکہ 31 اسٹیشنوں پر دوبارہ سگنل لگانے کے منصوبے پر 17 ارب روپے سے زائد لاگت آئے گی۔