پاکستان کا ہر شہری آپریشن ردالفساد کا حصہ ہے ، ڈاکٹر محمد علی

جمعرات 23 مارچ 2017 22:37

فیصل آباد۔23 مارچ(اُردو پوائنٹ اخبارتازہ ترین - اے پی پی۔ 23 مارچ2017ء) آپریشن ردالفساد پاک فوج کاہی نہیں بلکہ پاکستان کا ہر شہری اس اپریشن کا حصہ اور سپاہی ہے ۔ہم انشاء اللہ پاک فوج کے شانہ بشانہ ہیں انکے ساتھ ہیں اور اس عزم کے ساتھ کہ اللہ تعالیٰ ہمیں اس اپریشن میں کامیاب کر ے گا۔اور اس ملک کو دُنیا کا سب سے زیادہ ترقی یافتہ، امن اور دنیا کا سب سے اہم ملک بنائے گاجو ایک ایسی اسلامی اور اصلاحی ریاست کا نمونہ ہو گا۔

ان خیالات کا اظہار وائس چانسلر پروفیسر ڈاکٹر محمد علی نے گورنمنٹ کالج یونیورسٹی کے شعبہ نظامت امور طلبہ کے زیر اہتمام نیو کیمپس میں منعقدہ یومِ پاکستان کی تقریب سے خطاب کرتے ہوئے کیا انہوں نے مزید کہا کہ پاکستان ایک ایسا ملک ہے جو کہ طویل عرصہ سے دہشت گردی کی جنگ لڑرہا ہے۔

(جاری ہے)

پاکستان کی مخالف فورسز نہیں چاہتیں کہ یہاں امن ہو۔ انشاء اللہ ہم یہ جنگ جیتیں گے اور پاکستان سب سے زیادہ امن والا ملک ہو گا وہ دن جلد آئے گا جب دہشت گردی کا ناسور ختم ہو جائے گا۔

تقریب کا آغاز قرآن پاک کی تلاوت اور نعتِ شریف سے ہوا۔ مہمانِ خصوصی پروفیسر ڈاکٹر محمد علی( تمغہء امتیاز) نے ہلالی پرچم کشائی کی اور یونیورسٹی کے طلبہ نے قومی ترانہ پیش کیا۔ اس موقعہ پر سکیورٹی کے چاق و چوبند دستے نے سلامی بھی پیش کی۔اس تقریب میں ڈینز،ڈائریکٹرز، پرنسپلز، چیئرپرسن، کوارڈینیٹرز،انچارجز آف ٹیچننگ اور نان ٹیچننگ سٹاف کی کثیر تعداد نے شرکت کی۔