پشاور،ضلعی انتظامیہ کی پولیس کیساتھ مشترکہ کارروائی، یونیورسٹی روڈ پر 2 شیشہ سنٹروںپر چھاپہ ،5 افراد گرفتار

بدھ 22 مارچ 2017 21:24

پشاور(اُردو پوائنٹ اخبارتازہ ترین - آئی این پی۔ 22 مارچ2017ء) ضلعی انتظامیہ نے پولیس کے ساتھ مشترکہ کاروائی کر تے ہوئے یونیورسٹی روڈ پر 2 شیشہ سنٹروں پر چھاپہ مارتے ہوئے 5 افراد کو گرفتار کر لیا۔ تفصیلات کے مطابق ڈپٹی کمشنر پشاور ثاقب رضا اسلم کی ہدایت پر ایڈیشنل اسسٹنٹ کمشنر عبدالنبی اور ایڈیشنل اسسٹنٹ کمشنر سید شاہ زیب نے ڈی ایس پی ٹائون رشید خان اور ایس ایچ او محمد آصف کے ہمراہ مشترکہ کاروائی کر تے ہوئے یونیورسٹی روڈ 2 شیشہ سنٹروں کو سیل کر دیاجبکہ 5 افراد کو گرفتار کر لیا گیا۔

ان شیشہ سنٹروں کے بارے میں شکایات مل رہی تھیں کہ ان میں طلباء اورنوجوان جاتے ہیں جہا ں پر ان کو شیشہ پلایا جا تا ہے جس سے نوجوان نسل تباہی کی طرف جا رہی ہے۔ جس پر آج کی کاروائی کی گئی۔

(جاری ہے)

ان شیشہ سنٹروں میں بلیک ایند یلو لائونج اور کوہلہ لائونج میں شیشہ پلایا جا رہا تھا۔ انتظامیہ نے غصے کا اظہار کر تے ہوئے شیشہ سنٹروں کو سیل کر دیا جبکہ 5 افراد کو گرفتار کر لیا گیا جن کے خلاف قانون کیمطابق سخت کاروائی عمل میں لائی جائے گی۔جبکہ پشاور کے دیگر علاقوں میں بھی شیشہ سنٹروں کے خلاف کاروائی کی جا ئے گی۔ ڈپٹی کمشنر پشاور ثاقب رضا اسلم نے عوام سے اپیل کی ہے کہ وہ اپنے علاقوں میں شیشہ سنٹروں کی اطلاع دیں تانکہ ان کے خلاف سخت کاروائی کی جا ئے۔