صدر مملکت ممنون حسین سے پاکستان میں آغا خان کونسل کے صدر حافظ شیر علی کی ملاقات

یوم پاکستان کے موقع پر آغا خان کی طرف سے مبارکباد کا خط پیش کیا

بدھ 22 مارچ 2017 18:53

صدر مملکت ممنون حسین سے پاکستان میں آغا خان کونسل کے صدر حافظ شیر علی ..

اسلام آباد ۔ (اُردو پوائنٹ اخبارتازہ ترین - اے پی پی۔ 22 مارچ2017ء) صدر مملکت ممنون حسین نے کہا ہے کہ آغا خان کی متاثر کن اور متحرک قیادت میں آغا خان ڈویلپمنٹ نیٹ ورک (اے کے ڈی این)، آغا خان فائونڈیشن اور آغا خان ہیلتھ سروسز کی جانب سے پاکستان میں مہیا کی جانے والی سماجی و اقتصادی خدمات لائقِ تحسین ہیں۔ انہوں نے یہ بات آغا خان کونسل کے پاکستان میں صدر حافظ شیر علی سے گفتگو کرتے ہوئے کہی جنہوں نے بدھ کو ایوانِ صدر میں ان سے ملاقات کی اور یوم پاکستان کے موقع پر آغا خان کی طرف سے مبارکباد کا خط پیش کیا۔

صدر مملکت نے کہا کہ پاکستان اور خاص طور پر شمالی علاقوں میں اے کی ڈی این کی مسلسل مصروفیات سے ملک کے بنیادی ڈھانچہ اور عوام کی زندگیوں میں نمایاں فرق نظر آ رہا ہے۔

(جاری ہے)

صدر ممنون حسین نے آغا خان کے دادا سر سلطان شاہ آغا خان کا بحیثیت آل انڈیا مسلم لیگ کے پہلے صدر، ان کی صلاحیتوں اور تحریک پاکستان میں ان کے کردار کو سراہا۔ حافظ شیر علی نے پاکستان میں جاری مختلف شعبوں اور خصوصی طور پر ہائی ایکسیلینس سکول اسلام آباد کے بارے میں بریفنگ دی۔ انہوں نے بتایا خصوصی منصوبوں پر 11 جولائی 2017ء کو آغا خان کی ڈائمنڈ جوبلی کے دن کام کا آغاز کیا جائے۔ صدر ممنون حسین نے آغا خان کو ان کی ڈائمنڈ جوبلی تقریبات کے دوران پاکستان کا دورہ کرنے کی دعوت بھی دی۔