علامہ اقبال ائیر پورٹ ،پرواز کی تاخیر پر عمرہ زائرین کا احتجاج

ہنگامہ آرائی سے بچنے کیلئے پی آئی اے عملہ دفاتر کو تالے لگا کر غائب ہوگیا

منگل 21 مارچ 2017 17:34

علامہ اقبال ائیر پورٹ ،پرواز کی تاخیر پر عمرہ زائرین کا احتجاج

لاہور(اُردو پوائنٹ اخبارتازہ ترین - آن لائن۔ 21 مارچ2017ء) لاہور سے تین سو سے زائد زائرین عمرہ کو جدہ لے جانے والی پی آئی اے کی پرواز میں تاخیر کے باعث زائرین عمرہ علامہ اقبال انٹرنیشنل ائیرپورٹ پر سراپا احتجاج بن گئے اور انہوںنے ائیرپورٹ پر ایک ہنگامہ کھڑا کردیا صورتحال کو دیکھتے ہوئے پی آئی اے کا عملہ دفاتر کو تالے لگاکر غائب ہوگیا ہنگامہ آرائی سے قبل پی آئی اے حکام زائرین عمرہ کو بورڈنگ کارڈ جاری کرچکے تھے جبکہ ان کا سامان بھی بک کیاجاچکا تھا۔

(جاری ہے)

احتجاجی زائرین عمرہ کا کہنا تھا کہ انہیں پی آئی اے حکام کی جانب سے بتایا گیا تھا کہ ان کی پرواز پیر کی رات10بجے روانہ ہوگی جس کے لیے وہ شام چھ بجے ہی ائیرپورٹ پہنچ گئے لیکن بعدازاں انہیں بتایاگیا کہ جہاز دستیاب نہیں جیسے ہی جہاز دستیاب ہوا انہیں بھیج دیا جائے گا عمرہ زائرین کے مطابق13گھنٹے گزر جانے کے باوجود انہیں جہاز فراہم نہیں کیا گیا بار بار رابطہ کرنے پر پی آئی اے حکام کا کہنا تھا کہ انہیں جیسے ہی جہاز دستیاب ہوگا زائرین عمرہ کو جدہ بھیج دیا جائے گا۔(اے ملک)