حسین حقانی سچ اٴْگل دیں عافیہ کو انہوں نے ہی مقدمہ میں پھنسایا: فوزیہ صدیقی

حسین حقانی اور شکیل آفریدی غدار وطن اور سخت سزا کے مستحق ہیں،بہن عافیہ صدیقی کی پریس کانفرنس

پیر 20 مارچ 2017 13:47

حسین حقانی سچ اٴْگل دیں عافیہ کو انہوں نے ہی مقدمہ میں پھنسایا: فوزیہ ..

لاہور(اُردو پوائنٹ اخبارتازہ ترین - آن لائن۔ 20 مارچ2017ء) امریکہ میں قید بے گناہی کا شکار ڈاکٹر عافیہ کی ہمشیرہ ڈاکٹر فوزیہ صدیقی نے کہا ہے کہ حسین حقانی یہ سچ بھی اٴْگل دیں کہ عافیہ بے قصور ہے اور انہوں نے ہی امریکیوں کو خوش کرنے کی خاطر عافیہ کو جھوٹے مقدمے میں پھنسوایا۔ حسین حقانی اور شکیل آفریدی غدار وطن اور سخت سزا کے مستحق ہیں۔ عوام کا پیمانہ صبرلبریز ہورہا ہے۔

عافیہ کی واپسی میں تاخیرسے اشتعال بڑھ گیا تو اسے ہم بھی روک نہ سکیں گے۔چیف جسٹس سندھ، سابق گورنر پنجاب اور سابق وزیراعظم کے مغوی بیٹے رہا ہوگئے، عافیہ نہیں آئی۔ لاہور پریس کلب میں سیاسی و سماجی رہنمائوں کے ہمراہ پریس کانفرنس کر تے ہوئے ڈاکٹر فوزیہ صدیقی نے کہا کہ شکیل آفرید ی کو بھی اگر ریمنڈڈیوس کی طرح ملک سے فرار کروادیا گیا اور عافیہ نہیں آئی تو حکمرانوں کی غداری کے خلاف عوام سڑکوں پر ہوں گے۔

(جاری ہے)

جمہوریت کی دعویدار حکومت نے ڈاکٹر عافیہ کو بھلا دیا۔ رہنمائوں نے مطالبہ کیا کہ قوم کی بیٹی کو واپس لایا جائے۔انہوں نے کہا کہ مزید تاخیر کی صورت میں عوام مشتعل ہوکر سڑکوں پر نکل آئیں گے، پوری قوم کے دل عافیہ کے ساتھ دھڑکتے ہیں۔ تمام رہنمائوں نے 31 مارچ کو عافیہ کے اغوا کو 14 برس مکمل ہونے پر ملک بھر میں یوم سیاہ منانے کی اپیل کی۔