پاک فوج سی پیک کے خلاف دشمن کے ایجنڈے سے بخوبی آگاہ ہے، دشمن کے عزائم ناکام بنانے کے لیے مکمل تیار ہیں، آرمی چیف جنرل قمر جاوید باجوہ

ہفتہ 11 مارچ 2017 22:42

راولپنڈی ۔ (اُردو پوائنٹ اخبارتازہ ترین - اے پی پی۔ 11 مارچ2017ء) جنرل قمر جاوید باجوہ نے ہفتہ کو اسپیشل سیکیورٹی ڈویژن ہیڈ کوارٹرز کا دورہ کیا جہاں انہیں اسپیشل سیکیورٹی ڈویژن کے سیکیورٹی میکنزم پر بریفنگ دی گئی۔

(جاری ہے)

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کا کہنا ہے کہ پاک فوج سی پیک کے خلاف دشمن کے ایجنڈے سے بخوبی آگاہ ہے اور دشمن کے عزائم ناکام بنانے کے لیے مکمل تیار ہے۔

بری فوج کے سربراہ نے کہا کہ چین کی طرف سے اس منصوبے کو کامیاب بنانے میں فراہم کردہ تعاون اور معاونت کو پاکستان انتہائی قدر کی نگاہ سے دیکھتا ہے۔ آرمی چیف نے ڈویژن کی تیاری اور انتظامات کی تعریف کی۔ اس سے قبل آرمی چیف جب وہاں پہنچے تو جنرل افیسر کمانڈنگ میجر جنرل عابد رفیق نے ان کا استقبال کیا۔اس موقع پر چیف آف جنرل سٹاف لیفٹینٹ جنرل بلال اکبر بھی موجود تھے۔