ودیا بالن کی فلم ’’بیگم جان‘‘ 14 اپریل کو سینما گھروں کی زینت بنے گی

اداکارہ فلم میں تقسیم ہند کے زمانے کے حالات میں کردار کرتی نظر آئیں گی

ہفتہ 11 مارچ 2017 11:01

ممبئی (اُردو پوائنٹ اخبارتازہ ترین - این این آئی۔ 11 مارچ2017ء) بالی ووڈ اداکارہ ودیا بالن اپنی اگلی فلم ’’بیگم جان‘‘ میں تقسیم ہند کے زمانے کے حالات میں کردار کرتی نظر آئیں گی۔اداکارہ اس فلم میں 'میڈم' نامی خاتون کا کردار ادا کررہی ہیں، جن کا کوٹھا اس تقسیم کی لپیٹ میں آگیا۔ ودیا بالن کا اس فلم میں اپنے کردار کے حوالے سے کہنا تھا کہ تقسیم ہند کے حوالے سے لوگوں کے پاس جو تفصیلات ہیں وہ کتابوں سے ملی، ’’بیگم جان‘‘ کی کہانی بہت متاثر کن ہوگی کیوں کہ تقسیم ہند کے دوران خواتین پر بیتنے والے واقعات پر بہت ہی کم فلمیں بنائی گئی ہیں۔

اس فلم میں تقسیم کے دوران کوٹھوں کے حالات کو پیش کیا گیا اور یہ بھی بتایا گیا کہ اس دوران ان کوٹھوں کی خواتین نے اپنے حق کے دفاع کے لیے کیا کیا۔

(جاری ہے)

ودیا بالن کے مطابق اس فلم میں اس دوران ہونے والے تشدد کو بھی دکھایا جائے گا، ان کا کہنا تھا کہ ان کے لیے یہ کردار ادا کرنا کافی مشکل رہا۔ودیا بالن کا مزید کہنا تھا کہ میں ایک کوٹھے کی میڈم بنی ہوں، یہ فلم تقسیم ہند کے دور پر مبنی ہے، ہم نے فلم میں اپنے گھروں کے تباہ ہونے کے خوف کو پیش کیا، میرے لیے یہ فلم کرنا کافی مشکل تھا کیوں کہ میں پہلی مرتبہ اس قسم کی فلم میں کام کررہی ہوں۔

ودیا بالن نے بتایا کہ اس فلم کے ذریعے لوگ کوٹھوں پر زندگی گزارنے والی خواتین کی سوچ اور حالات کو بہتر انداز میں سمجھ پائیں گے۔فلم ’’بیگم جان‘‘ 14 اپریل کو سینما گھروں میں پیش کی جائے گی۔