کٹھ پتلی وزیراعلیٰ کی امن کے بدلے نوکریاں دینے اور پولیس سربراہ کی مجاہدین کے عزیزو اقارب کو انتقامی کارروائیوں کا نشانہ بنانے کی دھمکیوں کو مسترد کرتے ہیں‘مجاہدین کو فریب اور مکاری سے سرینڈر کرانے میں بھارت اور اس کے ایجنٹ ہمیشہ ناکام ہوئے ہیں کیوں کہ یہ عوامی تحریک ہے، جسے بھارتی جارحیت اور مکاری ختم نہیں کر سکتی

سرینگر، مظفر آباد(اُردو پوائنٹ اخبارتازہ ترین - آئی این پی۔ 09 مارچ2017ء) متحدہ جہاد کونسل کے سکریٹری جنرل اور تحریک المجاہدین کے امیر شیخ جمیل الرحمان نے کٹھ پتلی وزیراعلیٰ کی جانب سے امن کے بدلے نوکریاں دینے اور پولیس سربراہ کی مجاہدین کے عزیزو اقارب کو انتقامی کارروائیوں کا نشانہ بنانے کی دھمکیوں کو مسترد کرتے ہوئے کہا ہے کہ مجاہدین کو فریب اور مکاری سے سرینڈر کرانے میں بھارت اور اس کے ایجنٹ ہمیشہ ناکام ہوئے ہیں۔

کیوں کہ یہ عوامی تحریک ہے، جسے بھارتی جارحیت اور مکاری ختم نہیں کر سکتی۔ گزشتہ روز شیخ جمیل الرحمان نے دو ٹوک الفاظ میں کہا کہ بھارتی فورسز نے مجاہدین کے عزیز و اقارب کو ہمیشہ ہراساں کیا ، انہیں مظالم کا نشانہ بنا کر شہید کیا گیا اور جیلوں میں ڈال دیا گیا۔

(جاری ہے)

یہ ستم ظریفی ہے کہ بیرون ریاست سے آ کر ناجائز قبضہ اور جارحیت کرنے والی بھارتی فوج اور نیم فوجی ، کشمیریوں کے گھروں میں گھس کر ہماری شناخت دریافت کر رہے ہیں۔

اجنبی قابض فورسز اور پولیس ہماری ریاست میں ہمارا جینا حرام کر رہی ہے۔ لیکن ان کے یہ مظالم کشمیریوں کو آزادی کی جدو جہد سے پیچھے نہیں ہٹا سکتے۔ کشمیری آزادی حاصل کرنے کا مصمم عزم کر چکے ہیں۔ پولیس ڈی جی کی دھمکیاں یا وزیراعلیٰ کے لالچی بیانات کوئی معنی نہیں رکھتے۔ کشمیر پولیس ہی نہیں اگر فوج اور دیگر فورسز نے مجاہدین کے عزیز و اقارب کو ہراساں کرنے اور انتقام کا نشانہ بنانے کا سلسلہ بند نہ کیا تو جوابی اقدامات سے وہ بھی نہیں بچ سکیں گے۔ بھارتی فورسزاور ان کے حاشیہ برداروں نے اپنی پرموشن اور تمغوں کے لئے ریاستی دہشت گردی تیز کر دی ہے۔ لیکن وہ ہمیشہ کی طرح ناکام ہوں گے۔