اسلام آباد (اُردو پوائنٹ اخبارتازہ ترین - آئی این پی۔ 06 مارچ2017ء)
قومی اسمبلی میں
جماعت اسلامی، جے یو آئی ،
اے این پی ، پختونخوا میپ اور پی ٹی آئی کے ارکان کی جانب سے پنجاب ، سندھ اور بلوچستان سمیت ملک کے اکثر علاقوں میں پختونوں کے خلاف مبینہ انتقامی کارروائیوں اور گرفتاریوں کے خلاف شدید
احتجاج ، ان جماعتوں کے ارکان نے متنبہ کیا کہ اگر پختونوں کی پکڑ دھکڑ بند نہ کی گئی تو ایوان کی کارروائی کے بائیکاٹ سمیت اگر اقدامات کیے جا سکتے ہیں ۔
ایم کیو ایم ارکان کا
کراچی میں کارکنوں کی گرفتاریوں اور سیاسی وفاداریاں بدلنے کے لئے ڈالے جانے والے مبینہ دبائو کے خلاف علامتی واک آئوٹ ، وزیر مملکت طارق فضل چوہدری منا کر واپس لائے ۔ پیر کو ایوان میں نکتہ اعتراض پر ارکان
اسمبلی عبدالقہار ودان، صاحبزادہ طارق اللہ ،غلام سرور خان، حاجی غلام احمد بلور، مولانا جمالدین، کمال بنگلزئی، اعجاز جاکھرانی و دیگر ارکان نے اہم ملکی اور علاقائی ایشوز زیر بحث لائے ۔
(جاری ہے)
عبدالقہار ودان نے کہا کہ ملک میں بسنے والے پشتونوں کو آئین میں دیئے گئے بنیادی انسانی حقوق سے محروم کیا جا رہا ہے ۔ پنجاب ، سندھ ، بلوچستان اور کے پی میں پشتونوں کو گرفتار کیا جا رہا ہے ۔ اس حوالے سے ہماری تحریک التواء ایوان میں زیر بحث لائی جائے ۔ یہ معامل قابل برداشت نہیں ہے ۔ اگر یہ ظلم ایوان میں زیر بحث نہ لایا گیا تو ایوان سے واک آئوٹ کریں گے ۔
صاحبزادہ طارق اللہ نے کہا کہ سندھ اور پنجاب میں پختونوں کی پکڑ دھکڑ جاری ہے جو قابل مذمت ہے ۔ لاہور اور
کراچی میں شدید زیادتیاں ہیں ۔ رجب بلوچ نے کہا کہ میں بلوچستان سے تعلق رکھتا ہے اور وسطی پنجاب سے رکن
اسمبلی بنا ہوں ۔ غیر قانونی افغانوں کے خلاف کارروائیاں کی جا رہی ہیں ۔ پشتونوں کے خلاف کارروائیوں کا تاثر درست نہیں ہے کسی ایک نسل کے ساتھ زیادتی کا پراپیگنڈہ درست نہیں ۔
غلام سرور خان نے کہا کہ چمن اور طورخم بارڈر کیوں بند کیا گیا ۔ پختونوں نے کشمیر کی آزادی اور ملک کے دفاع کے لئے قربانیاں دی ہیں ۔ یہ محب وطن ہیں ان کے خلاف کارروائیاں نہ کی جائیں ۔ کمال بنگلزئی نے کہا کہ مردم شماری کے لئے فوجی حکام نے کوئٹہ کالج میں پرنسپل کو کالج 15 مارچ سے 15 مئی تک بند کرنے کے لئے کہا ہے ۔ اعجاز جاکھرانی نے کہا کہ پانامہ کے شور میں پانامہ کی ایشو دب گیا ہے ۔
خراب اے ٹی آر ابھی تک پرواز کر رہے ہیں ۔ ترکی سے لیز پر لیے گئے جہاز آرام دہ نہیں ان جہازوں کو شارٹ روٹ پرچلایا جائے ۔ ان جہازوں پر انجکشن لگا کر بٹھایا جا سکتا ہے ۔ محبوب عالم نے کہا کہ
کراچی میں کارکنوں کو ماورائے عدالت قتل کیا جا رہا ہے ۔ ہمارے لوگوں کو سیاسی وفادارایں تبدیل کرنے کے لئے مجبور کیا جا رہا ہے ۔ ہم اس ظلم کے خلاف علامتی واک آوٹ کرنا چاہتا ہوں ۔
ڈپٹی سپیکر نے وزیر مملکت طارق فضل چوہدری کوہدایت کی کہ وہ علامتی واک آئوٹ کرنے والے ارکان کو واپس لائیں ۔ بسم اللہ خان نے کہا کہ لاہور کے دھماکے میں ملوث سہولت کار کا گھر قبائل نے مسمار کر دیا ہے ۔ باجوڑ کے لوگوں کو ملک بھر میں تنگ کیا جا رہا ہے ۔ پنجاب اور سندھ پولیس کو ہدایت کی جائے کہ وہ قانونی دستاویزات رکھنے والے پختون عوام کو تنگ نہ کریں ۔
خلیل جارج نے کہا کہ پی ایس ایل کے کامیاب انعقاد پر مبارک باد پیش کرتے ہیں ۔ پنجاب اور وفاقی حکومت مبارک باد کی مستحق ہے ۔ کل پاکستان کی جیت ہوئی اور دہشت گرد ہار گئے ۔ شگفتہ جمانی نے کہا کہ سیہون شریف میں خود کش حملے کی شدید مذمت کرتے ہیں ۔ یہ درد ناک واقعہ سندھ صوفی ازم کا مرکز ہے ۔ پورے برصغیر کے لوگ وہاں آتے ہیں اگر وزیر داخلہ نیشنل ایکشن پروگرام پر سنجیدہ ہوتے تو اس طرح کا حادثہ نہ ہوتا ۔
وزیر اعظم اور وزیر داخلہ ریسٹ ہائوس میں بیٹھ کر واپس چلے گئے ۔ شہداء کے ورثاء کو معاوضہ بھی نہیں دیا گیا ۔ حاجی غلام احمد بلور نے کہا کہ سندھ اور پنجاب میں پختونوں کے ساتھ شدید ظلم کیا جارہا ہے ۔ کیا پختون تھرڈ کلاس شہری ہیں جب لڑنا ہو تو پتخونوں کو آگے کرو اور بعد میں بھی مارا جائے ۔ یہ صوبائی نہیں وفاقی معاملہ ہے پختون پاکستانی ہیں اس پر پارلیمانی کمیٹی بنائی جائے ۔ حیدر آباد میں 15 پختونوں کو زنجیروں میں باندھ کر تھانے لے جایا گیا کیا وہ انسان نہیں تھے وزیر داخلہ سے جواب طلب کیا جائے ۔ جمال الدین نے کہا کہ پختونوں کو تنگ کیا جا رہا ہے مگر ہم بغاوت نہیں کریں گے بغاوت ہمیشہ مشرق سے ہوئی مغرب سے نہیں ہوئی ۔ …(م د+ع ع)
