لاپتہ افراد کیس، سندھ ہائیکورٹ درخواستوں کی عدم پیروی پر ایم کیوایم پر برہم

فاروق ستارمقدمات کی پیروی نہیں کر سکتے تو درخواستیں کیوں دائر کرتے ہیں، سندھ ہائی کورٹ

جمعرات 2 مارچ 2017 16:25

لاپتہ افراد کیس، سندھ ہائیکورٹ درخواستوں کی عدم پیروی پر ایم کیوایم ..

کراچی(اُردو پوائنٹ اخبارتازہ ترین - این این آئی۔ 02 مارچ2017ء) سندھ ہائی کورٹ نے لاپتہ افراد کی بازیابی کے لیے دائر درخواستوں کی سماعت کے دوران ایم کیو ایم کی جانب سے عدم پیروی پر برہمی کا اظہارکیا ہے۔تفصیلات کے مطابق سندھ ہائی کورٹ میں ایم کیوایم پاکستان کے 10 لاپتہ کارکنوں سمیت 60 افراد کی بازیابی سے متعلق کیس کی سماعت ہوئی۔

(جاری ہے)

عدالت میں ایم کیو ایم پاکستان کی جانب سے کیسز کی مسلسل عدم پیروی پر عدالت نے اظہار برہمی کرتے ہوئے کہا کہ فاروق ستار اور ایم کیوایم کے لاپتہ کارکنوں کے اہل خانہ مقدمات کی پیروی کرنے نہیں آتے اور پھر کہتے ہیں عدالتیں ہمارے ساتھ انصاف نہیں کرتیں، اگر فاروق ستارمقدمات کی پیروی کے لئے عدالت میں نہیں آسکتے تو انہوں نے درخواستیں کیوں دائر کر رکھی ہیں۔

عدالت میں تفتیشی افسر نے ایم کیوایم کے کارکن فہیم ریاض کی رپورٹ پیش کی جس میں بتایا گیا کہ 2013 سے لاپتہ کہلانے والا فہیم ریاض پولیس کو سنگین مقدمات میں مطلوب تھا اور جیل میں ہے۔عدالت نے کہا کہ جس گھر کا فرد غائب ہوجائے اس کی تکلیف کا اندازہ نہیں کیا جاسکتا عدالت نے لاپتہ شہریوں کی فوری بازیابی کا حکم دیتے ہوئے پولیس، رینجرز اور فریقین سے 2 ہفتوں میں رپورٹ طلب کرلی ۔