پاکستان نے جی ایس ایم اے گورنمنٹ لیڈر شپ ایوارڈ 2017 جیت لیا، وزیراعظم کی انوشہ رحمان کو مبارکباد

اسلام آباد/بارسلونا (اُردو پوائنٹ اخبارتازہ ترین - آئی این پی۔ 01 مارچ2017ء) پاکستان نے اسپین میں ہونے والا جی ایس ایم اے گورنمنٹ لیڈر شپ ایوارڈ 2017 جیت لیا،ایوارڈ ٹیلی کام کے شعبے میں گذشتہ تین سالون میں فقیدالمثال ترقی اور کامیاب ٹیلی کام پالیسی وضع کرنے پر دیا گیا، وزیر مملکت برائے انفارمیشن ٹیکنالوجی انوشہ رحمان نے کہا ہے کہ ایوارڈ وزارت انفارمیشن ٹیکنالوجی، پی ٹی اے اور فریکیونسی ایلوکیشن بورڈ کی مشترکہ کاوشوں کا ثمر اور بین الاقوامی ٹیلی کام کمیونٹی کی طرف سے وزیراعظم پاکستان محمد نواز شریف کے وژن ڈیجیٹل پاکستان اور حکومتی پالیسیوں پر اعتماد کا اظہار ہے۔

تفصیلات کے مطابق گزشتہ روز اسپین کے شہر بارسلونا میں جاری موبائیل ورلڈ کانگریس کے زیر اہتمام ایک پر وقار تقریب برائے تقسیم ایوارڈ 2017 منعقد ہوئی جس میں --" جی ایس ایم اے گورنمنٹ لیڈر شپ ایوارڈ برائے 2017 کیلئے پاکستان کو فاتح قرار دیا گیا۔

(جاری ہے)

پاکستان کیطرف سے یہ ایوارڈ وزیر مملکت برائے انفارمیشن ٹیکنالوجی مسز انوشہ رحمٰن نے وصول کیا۔

واضع رہے کہ ٹیلی کام کے شعبے میں یہ ایوارڈ گذشتہ ایک دہائی کے دوران پہلی مرتبہ پاکستان کے حصے میں آیا ہے۔ پاکستان کو یہ ایوارڈ ٹیلی کام کے شعبے میں گذشتہ تین سالون میں فقیدالمثال ترقی اور کامیاب ٹیلی کام پالیسی وضع کرنے پر دیا گیا ہے۔ اس موقع پر خطاب کرتے ہوئے وزیر مملکت برائے آئی ٹی اینڈ ٹیلی کام مسز انوشہ رحمٰن نے ورلڈ ٹیلی کام کمیونٹی اور جی ایس ایم اے کا شکریہ ادا کرتے ہوئے کہا کہ یہ ایوارڈ وزارت انفارمیشن ٹیکنالوجی، پی ٹی اے اور فریکیونسی ایلوکیشن بورڈ کی مشترکہ کاوشوں کا ثمر ہے اور بین الاقوامی ٹیلی کام کمیونٹی کی طرف سے وزیراعظم پاکستان محمد نواز شریف کے وژن ڈیجیٹل پاکستان اور حکومتی پالیسیوں پر اعتماد کا اظہار ہے۔

انہوں نے گذشتہ دو سالوں میں دو جی ایس ایم اے عالمی ایوارڈ پاکستان کو دیے جانے پر وزیراعظم پاکستان اور پوری پاکستانی قوم کو مبارکباد پیش کی۔ واضع رہے کہ گذشتہ برس شفاف سپیکٹرم نیلامی پر پاکستان کو عالمی ایوارڈ سے نوازا گیا تھا۔ موجودہ ایوارڈ ڈیجیٹل مارکیٹ کے قیام اور حکومت کی مثبت پالیسیوں کے تسلسل کیلئے انتہائی اہمیت کا حامل ہے۔

انوشہ رحمٰن نے کہا کہ عالمی ٹیلی کام کمیونٹی نے ہماری وضع کردہ ٹیلی کام پالیسی 2015 کو بہترین پالیسی قرار دیا ہے۔ کیونکہ ہم نے اس پالیسی میں ٹیلی کام کے شعبہ سے وابستہ تمام چیلنجز کا احاطہ کیا ہے۔ اور صارفین کو بہترین ٹیلی کام سہولیات کی فراہمی کیلئے ہر ممکن اقدام کیے ہیں۔ جس سے نہ صرف ٹیلی کام کے شعبے کو فروغ ملے گا بلکہ یہ پالیسی علمی اقتصادیات اور ڈیجیٹل شمولیت سمیت ملک کی مجموعی معاشرتی و اقتصادی ترقی میں انتہائی مددومعاون ثابت ہوگی۔

اس اجلاس کے ساتھ ساتھ وزیر مملکت انوشہ رحمٰن نے آئی کین کے چیئرمین مسٹر گورانی موربی اور اتصلات، ٹیلی نار اور ومپل کام کی اعلیٰ قیادت سے بھی ملاقاتیں کیں اور انہیں پاکستان میں برپا ڈیجیٹل انقلاب میں حکومت کے ساتھ مل کر کام کرنے کی پیش کش کی۔ عالمی ٹیلیکام کمیونٹی نے ایوارڈ جیتنے پر وزیر مملکت انوشہ رحمٰن کو مبارکباد دی اور حکومت پاکستان کی ٹیلی کام پالیسیوں کے حوالے سے اپنے بھرپور تعاون کا یقین دلایا ہے۔ (ار)