سٹیٹ بینک نے افغانستان کے ساتھ زمینی تجارت کا طریقہ کار آسان بنا دیا

درآمدات کے لیے بینکوں کے ذریعے رجسٹرڈ کنٹریکٹ کے ساتھ شپنگ دستاویزات کی شرط نہیں ہوگی ، دوہری ادائیگیوں کا خاتمہ ہو گا

منگل 28 فروری 2017 16:47

سٹیٹ بینک نے افغانستان کے ساتھ زمینی تجارت کا طریقہ کار آسان بنا دیا

کراچی(اُردو پوائنٹ اخبارتازہ ترین - آن لائن۔ 28 فروری2017ء) سٹیٹ بینک آف پاکستان نے افغانستان کے ساتھ زمینی راستوں خصوصاً براستہ طورخم اور چمن بارڈر تجارت کیلئے کنٹریکٹ کی رجسٹریشن اور متعلقہ ادائیگی کا طریقہ کار آسان بنا دیا ہے۔ پاکستان میں آنے والی تمام درآمدات کے لیے لازمی ہے کہ وہ الیکٹرانک امپورٹ فارم کے ذریعے انجام دی جائیں ، ای آئی ایف کے نفاذ کا مقصد جعلسازی کرنے والے عناصر کی جانب سے پاکستان سے درآمدات کی غیر قانونی اور دوہری ادائیگیوں کا خاتمہ کرنا تھا۔

(جاری ہے)

تاجروں کو سہولت دینے کے لیے کنٹریکٹ کی رجسٹریشن اور متعلقہ ادائیگی کا طریقہ کار آسان بنایا گیا ہے ، اس طرح اب افغانستان سے زمینی راستے سے آنے والی درآمدات کے لیے بینکوں کے ذریعے رجسٹرڈ کنٹریکٹ کے ساتھ شپنگ دستاویزات کی شرط نہیں ہوگی۔ پاکستانی درآمد کنندگان افغان برآمد کنندگان سے براہ راست شپنگ دستاویزات وصول کرسکتے ہیں۔ متعدد شپمنٹ کے لیے انہیں ای آئی ایف کی اجازت کے لیے ہر بار بینک نہیں جانا پڑے گا ، توقع ہے کہ اس نرمی سے مذکورہ علاقے کے درآمد کنندگان کو کثیر فائدے ہوں گے۔